عظمیٰ نیوز سروس
نیویارک //ویٹی کن نے اعلان کیا ہے کہ نئے منتخب شدہ پوپ لیو چودھویں کی باقاعدہ افتتاحی عبادت (اناؤگریشن ماس) اتوار 18 مئی کو سینٹ پیٹرز اسکوائر میں منعقد کی جائے گی۔امریکا سے تعلق رکھنے والے کارڈینل رابرٹ پریوسٹ کو گزشتہ روز 133 کارڈینلز کے اجلاس کے دوسرے نیا پوپ منتخب کیا گیا تھا۔رابرٹ پریوسٹ نے نیا پوپ بننے کے بعد اپنے لیے لقب پوپ لیو (چودھویں) پسند کیا ہے اور اب انھیں اسی نام سے پکارا جائے گا۔نئے پوپ بننے کے بعد روایت ہے کہ ایک خصوصی ’’افتتاحی عبادت‘‘ سے ان کے منصب کا باضابطہ آغاز کیا جاتا ہے۔جس میں دنیا بھر سے اہم شخصیات، مذہبی رہنما اور زائرین شرکت کرتے ہیں۔ویٹی کن کے مطابق نئے پوپ لیو (چودھویں) کی افتتاحی عبادت 18 مئی کو ویٹی کن کے مرکزی مقام سینٹ پیٹرز میں اسکوائر میں ہوگی۔اعلامیے میں مزید کہا گیا ہے کہ نئے پوپ اپنی پہلی عوامی ملاقات بدھ 21 مئی کو منعقد کریں گے، جہاں وہ عالمی برادری سے خطاب کریں گے۔خیال رہے کہ نئے پوپ لیو (چودھویں) نے کل ویٹی کن کے مشہور سسٹین چیپل میں عبادت کی قیادت بھی کی۔نئے منتخب ہونے والے پوپ لیو فورٹینتھ (چہار دہم) نے جمع ہونے والے اجتماع سے اپنے پہلے خطاب میں کہا کہ پورے کیتھولک چرچ کے لیے ایک دیانتدار منتظم بننے کی امید رکھتا ہوں۔انہوں نے کہا کہ امید ہے میرا انتخاب کیتھولک چرچ کو دنیا کی تاریک راتوں میں روشنی لانے میں مدد دے سکے گا۔نو منتخب پوپ نے مزید کہا کہ چرچ کو اپنی شناخت اپنے ارکان کے تقدس سے کرنی چاہیے ، نہ کہ اس کی عمارتوں کی عظمت سے ۔پاپائے اعظم نے کہا ان علاقوں تک پہنچنا چاہیے جہاں ایمان کی کمی ہے اور جہاں لوگ ٹیکنالوجی، پیسہ، کامیابی یا طاقت کو ترجیح دیتے ہیں۔واضح رہے کہ گذشتہ روز ویٹیکن میں کیتھولک مسیحیوں کے نئے روحانی پیشوا کا انتخاب کیا گیا۔ ان کا انتخاب کم از کم 4 مرتبہ کی ووٹنگ کے بعد ہوا ہے ۔
