عظمیٰ نیوزسروس
جموں//جموں و کشمیر نیشنل کانفرنس صوبائی صدر رتن لال گپتا نے پختہ اعتماد کا اظہار کیا ہے کہ این سی کانگریس اتحاد جموں و کشمیر میں اگلی مستحکم اور ترقی پر مبنی حکومت بنائے گا۔ رتن لال گپتا نے اسمبلی انتخابات کے تین مرحلوں میں 69.65 فیصد ووٹ ڈالنے کی طرف اشارہ کیا جو تبدیلی کی عوام کی خواہش کا واضح اشارہ ہے۔سینئر این سی لیڈر نے کہا’’جموں و کشمیر کے لوگ بی جے پی کے تحت پچھلے دس سال کی بدانتظامی سے تنگ اور مایوس ہوچکے ہیں۔ ایک مستحکم حکمرانی کی تڑپ ہے، اور این سی کانگریس اتحاد اس ضرورت کو پورا کرنے کے لیے پرعزم ہے‘‘۔انہوں نے اس بات پر زور دیا کہ جموں و کشمیر کو اپنے شہریوں کو درپیش اہم مسائل کو حل کرنے کے لیے ایک مستحکم حکومت کی ضرورت ہے۔ انہوں نے کہا کہ ہماری توجہ ایک ایسی حکومت کی فراہمی پر مرکوز رہے گی جو منشیات سے پاک اور بدعنوانی سے پاک ہو، جو جموں و کشمیر کے روشن مستقبل کو یقینی بنائے۔ریاست کے لیے این سی کانگریس اتحاد کے وژن کو اجاگر کرتے ہوئےگپتا نے مزید کہا کہ جماعتیں جموں و کشمیر میں امن، ترقی اور خوشحالی کی بحالی کے لیے اپنی کوششوں میں متحد ہیں۔انکاکہناتھا “ہم ایک جموں اور کشمیر کی تعمیر کا مقصد رکھتے ہیں جہاں سب کے لیے مواقع پیدا ہوں، اور جہاں لوگ بدعنوانی اور منشیات کے استعمال کی لعنت سے پاک، خوف کے بغیر رہ سکیں‘‘۔
