عظمیٰ نیوز ڈیسک
پریاگ راج//پریاگ راج میں سنگم پر منعقد ہونے والا دنیا کا سب سے بڑا مذہبی اجتماع مہا کمبھ پوش پورنیما کے موقع پر پہلے بڑے اسنان یعنی غسل کی رسم کے ساتھ شروع ہوا۔ گنگا، جمنا اور سرسوتی کے سنگم پر منعقد ہونے والے عقیدے کی اس تقریب میں اگلے 45دنوں کے دوران روحانیت کے کئی رنگ بکھریں گے۔مہا کمبھ ہر 12 سال بعد منعقد کیا جاتاہے۔ اسی لیے اتر پردیش حکومت کو یقین ہے کہ اس بار مہا کمبھ میں 35کروڑ عقیدت مند آئیں گے۔عقیدت مندوں کی تعداد پہلے ہی اس مہا کمبھ کی روحانی عظمت کی کہانی سنا رہی ہے۔ ایک اندازے کے مطابق، مہا کمبھ کے باضابطہ آغاز سے دو دن پہلے 11جنوری 2025کو ریکارڈ 25لاکھ لوگوں نے سنگم میں ڈبکی لی۔حکام کے مطابق’’یہ ایک عظیم الشان مہا کمبھ ہوگا، جس میں روحانیت کے ساتھ ساتھ جدیدیت کو بھی دکھایا جائے گا کیونکہ یہ ایک قسم کا ‘ڈیجی کمبھ’ بھی ہوگا جس میں اے آئی(مصنوعی ذہانت)کا بڑے پیمانے پر استعمال کیا جائے گا‘‘۔اس موقع پر وزیر اعلیٰ یوگی آدتیہ ناتھ نے عقیدتمندوں، سنتوں، مہاتمائوں اورعقیدتمندوںکا پرتپاک خیرمقدم کیا اور انہیں مہاکمبھ میں ڈبکی کیلئے نیک خواہشات کا اظہار کیا۔تقریب کی اہمیت پر روشنی ڈالتے ہوئے وزیر اعلیٰ نے مہاکمبھ کو ہندوستان کے روحانی اور ثقافتی ورثے کی ایک قابل فخر علامت کے طور پر بیان کیا جو کہ’تنوع میں اتحاد‘کا جوہر ہے۔انہوں نے امید ظاہر کی کہ مراقبہ اور گنگا کے پانی میں غسل کے ذریعے روحانی تکمیل کے خواہاں تمام لوگوں کی خواہشات پوری ہوں گی۔انہوں نے مزید کہا’’مہاکمبھ صرف ایک مذہبی اجتماع نہیں ہے بلکہ سناتن ثقافت اور روایات کے عالمی وقار کا ثبوت ہے‘‘۔وزیر اعلیٰ نے یقین دلایا کہ تقریب کو عظیم الشان بنانے کیلئے جامع انتظامات کیے گئے ہیں۔ صفائی، سیکورٹی، صحت کی دیکھ بھال، ٹریفک مینجمنٹ اور رہائش کی سہولیات پر خصوصی توجہ دی گئی ہے۔ ریاست کے چیف سکریٹری منوج کمار سنگھ نے بتایا کہ مہا کمبھ میلہ کے علاقے میں 55 سے زیادہ پولیس اسٹیشن قائم کیے گئے ہیں اور تقریبا 45 ہزار پولیس اہلکاروں کو ڈیوٹی پر تعینات کیا گیا ہے۔ انہوں نے بتایا کہ کسی بھی قسم کی گڑبڑ کو روکنے کے لیے سوشل میڈیا کی مسلسل نگرانی سے متعلق منصوبوں کی بھی منظوری دی گئی ہے۔ اس مہا کمبھ میں مختلف فرقوں کے سنتوں کے 13 اکھاڑے حصہ لے رہے ہیں، جو سب کی توجہ اپنی جانب مبذول کر رہے ہیں۔پریاگ راج میں مختلف دیواروں کو پینٹنگز سے سجایا گیا ہے جس میں ہندو مذہب کے مختلف پہلوں، دیوی دیوتائوں اور مذہبی کتابوں میں مذکور اہم واقعات کو دکھایا گیا ہے۔ شہر کے چوکوں کو مختلف مذہبی اشیا جیسے کلش، شنکھ اور سوریہ نمسکار آسن کے مختلف آسن سے بھی سجایا گیا ہے۔ اس کے علاوہ شہر کے بیشتر بڑے چوراہوں کو نئے سرے سے ڈیزائن کیا گیا ہے۔پولیس کی جانب سے مختلف چوراہوں پر بیریکیڈس بھی لگائے گئے ہیں، جس سے پولیس کو بھیڑ کی نقل و حرکت پر قابو پانے میں مدد ملے گی۔ دریا کے ایک سرے سے دوسرے سرے تک لوگوں کی آمدورفت کو آسان بنانے کے لیے سنگم کے علاقے میں 30 سے زیادہ پنٹون پل بھی بنائے گئے ہیں۔
کروڑوں لوگوں کیلئے خاص | ہندوستانی اقدار اور ثقافت کیلئے اہم:مودی
یو این آئی
نئی دہلی//وزیر اعظم نریندر مودی نے پیر کو مہا کمبھ کے آغاز کے دن کو ان کروڑوں لوگوں کیلئے ایک خاص دن قرار دیا جو ہندوستانی اقدار اور ثقافت کو اہمیت دیتے ہیں۔ایکس پر ایک پوسٹ میں مودی نے کہا ان لاکھوں لوگوں کے لیے ایک بہت ہی خاص دن جو ہندوستانی اقدار اور ثقافت کو پسند کرتے ہیں! مہا کمبھ 2025 کا آغاز پریاگ راج میں ہوا، جس نے لاتعداد لوگوں کو عقیدے، عقیدت اور ثقافت کے مقدس سنگم میں اکٹھا کیا۔ مہا کمبھ ہندوستان کے ابدی روحانی ورثے کی علامت ہے اور عقیدے اور ہم آہنگی کا جشن مناتا ہے۔واضح رہے کہ مہا کمبھ دنیا کا سب سے بڑا عوامی اجتماع اور عقیدہ کا اجتماعی پروگرام ہے، جو 12 سال کے وقفے سے منعقد کیا جاتا ہے۔ اس اجتماع میں بنیادی طور پر تمام علاقوں سے تپسوی، سنت، سادھو، سادھوی اور تبھی علاقوں کے تیرھ یاتری شرکت کرتے ہیں۔
اس سال مہاکمبھ میلہ 13 جنوری سے 26 فروری تک پریاگ راج میں منعقد کیا جا رہا ہے۔
ضرورت پڑنے پرسپیشل ٹرینیں چلانے کا منصوبہ
یو این آئی
نئی دہلی//انڈین ریلوے نے پریاگ راج میں مہاکمبھ میلے کیلئے خصوصی ٹرینوں کے آسانی سے چلانے کیلئے ڈیڈیکیٹڈ فریٹ کوریڈور(ڈی ایف سی)کا زیادہ سے زیادہ استعمال کرنے کا منصوبہ بنایا ہے۔ذرائع کے مطابق نارتھ سینٹرل ریلوے میں دادری اور مغل سرائے کے درمیان مین ٹرنک لائن پر ایک بھی مال گاڑی نہیں چلے گی۔ ڈی ایف سی پر 100 فیصد مال گاڑیاں چلیں گی۔ذرائع نے یہ بھی بتایا کہ اگر ضرورت پڑی تو مہا کمبھ کے لیے چلنے والی خصوصی ٹرینوں کو ڈی ایف سی لائن سے نکالا جائے گا۔ تاکہ بھیڑ کی وجہ سے گاڑیوں کی نقل و حمل میں خلل نہ پڑے اور ٹرینیں وقت پر روانہ ہوسکیں۔انڈین ریلوے نے آج سے خصوصی ٹرینوں کے تقریبا 13 ہزار ٹرپس چلانے کا انتظام کیا ہے۔ پریاگ راج سے تمام سمتوں کے لیے مختلف اسٹیشن مقرر کیے گئے ہیں۔ ڈی ایف سی کی وجہ سے دہلی-کانپور-مغل سرائے روٹ پر ٹرینوں کو جلد ہی راستہ مل سکے گا۔
