عاصف بٹ
کشتواڑ//ضلع کشتواڑ کے فاریسٹ ڈویژن مڑواہ میں مبینہ طور پر جنگلات کی کٹائی اور کمپارٹمنٹ نمبر 39A میں منظور شدہ لکڑی کے سلیپروں کی تقسیم میں تضادات کو لے کر ایک تنازعہ کھڑا ہو گیا ہے۔ مقامی رہائشیوں کا دعویٰ ہے کہ انہیں وہ لکڑی کبھی نہیں ملی جو کہ انہیں الاٹ کی گئی تھی جبکہ حکام کا کہنا ہے کہ تقسیم ریکارڈ کے مطابق کی گئی ہے۔ اطلاعات کے مطابق کئی مقامی لوگوں نے خدشات کا اظہار کیا ہے کہ منظور شدہ سلیپر یا تو غلط استعمال کیے گئے تھے یا پھر کبھی تقسیم نہیں کیے گئے تھے۔ مقامی فارسٹ گارڈ سمیر احمد نے کہا ہے کہ اس کمپارٹمنٹ میں لکڑی کی کوئی منظوری جاری نہیں کی گئی۔ مقامی لوگوں نے بتایا کہ انہیںخدشہ ہے کہ محکمہ جنگلات کے اندر بدانتظامی یا بدعنوانی کا معاملہ ہو سکتا ہے۔ لوگ حقیقت سے پردہ اٹھانے کے لیے مکمل تحقیقات کا مطالبہ کر رہے ہیں۔ ایک مقامی رہائشی نے نام ظاہر نہ کرنے کی شرط پر بتایا کہ یہ صرف لکڑی کے بارے میں نہیں ہے بلکہ احتساب کے بارے میں ہے،اگر منظور شدہ لکڑی کا غلط استعمال کیا گیا ہے تو حکام کو سخت کارروائی کرنی چاہیے، ہم انکوائری کا مطالبہ کر رہے ہیں، ہم اسمیں ملوث افراد کے خلاف اے سی بی و محکمہ جنگلات کی ویجی لنس ونگ سے مداخلت کرنے کی اپیل کرتے ہیں۔انہوںنے کہا کہ وہ کمپارٹمنٹ 39A-B برہمیس میں لکڑی کی تقسیم کا سرکاری ریکارڈ حاصل کرنے کے لیے آر ٹی آئی درخواست دائر کرنے پر بھی غور کر رہے ہیں۔ علاقے کے لوگ معاملے میں شفافیت اور جوابدہی کی امید کرتے ہوئے حکام کے جواب کے منتظر ہیں کہ کسطرح کی کاروائی اعلیٰ حکام کی جانب سے کی جائےگی۔
