مودی کا دورہ جموں و کشمیر 15 مئی کو متوقع

 جموں//وزیر اعظم نریندر مودی امکانی طور پر 15 مئی کو جموں وکشمیر کا دورہ کرکے مختلف تعمیراتی پروجیکٹوں کا سنگ بنیاد رکھیں گے۔ پارٹی ذرائع کے مطابق ’پی ایم مودی امکانی طور پر 15 مئی کو ریاست کے دورے پر آئیں گے‘۔ انہوں نے بتایا کہ مودی سرمائی دارالحکومت جموں میں دو بڑے پروجیکٹوں کا سنگ بنیاد رکھنے کے علاوہ ایک تعمیراتی پروجیکٹ کا افتتاح کریں گے۔ بی جے پی ذرائع نے بتایا کہ وزیر اعظم جموں رنگ روڑ اور آل انڈیا انسٹی چیوٹ آف میڈیکل سائنسز (ایمز) کے پروجیکٹوں کا سنگ بنیاد رکھیں گے۔ایک رپورٹ کے مطابق وزیر اعظم اپنے دورے کے دوران گرمائی دارالحکومت سری نگر کے مضافات میں قائم شیر کشمیر زرعی یونیورسٹی کی ایک تقریب میں بھی شرکت کریں گے۔ مذکورہ رپورٹ کے مطابق وزیر اعظم مودی زوجیلا ٹنل کے پروجیکٹ کا بھی سنگ بنیاد رکھیں گے۔ اس ٹنل کے بننے سے سری نگر لیہہ قومی شاہراہ سال بھر کھلی رہے گی۔