یو این آئی
نئی دہلی//وزیر اعظم نریندر مودی 29اور 30مئی 2025کو سکم، مغربی بنگال، بہار اور اتر پردیش کے اہم دورے پر ہوں گے۔شمالی ہند کے اس دورے کے پہلے مرحلے میں 29مئی کو وزیر اعظم سکم کا دورہ کریں گے، جہاں وہ تقریباً 11بجے سکم50@پروگرام میں شرکت کریں گے۔ وہ سکم میں متعدد ترقیاتی منصوبوں کا افتتاح کریں گے اور سنگ بنیاد بھی رکھیں گے اور اس موقع پر اجتماع سے خطاب بھی کریں گے۔ اس کے بعد مغربی بنگال کا دورہ کریں گے جہاں وہ علی پور دوار اور کوچ بہار اضلاع میں تقریبا ً2:15بجے سٹی گیس ڈسٹری بیوشن پروجیکٹ کا سنگ بنیاد رکھیں گے۔اس کے بعد تیسرے مرحلے میں وزیر اعظم بہار کا دورہ کریں گے اور تقریباً 5:45بجے پٹنہ ہوائی اڈے کی نئی ٹرمینل کمپلیکس کا افتتاح کریں گے۔30مئی2025کو صبح تقریباً 11بجے وہ بہار کے کاراکاٹ میں 48,520کروڑ روپے کے ترقیاتی پروجیکٹوں کا افتتاح کریں گے اور سنگ بنیاد رکھیں گے ۔اس موقع پر وہ عوامی جلسہ سے بھی خطاب کریں گے۔وزیر اعظم اس کے بعد اتر پردیش کا دورہ کریں گے، جہاں وہ تقریباً 2:45بجے کانپورشہر میں 20,900کروڑ روپے کے متعدد ترقیاتی پروجیکٹوں کا سنگ بنیاد رکھیں گے اور افتتاح کریں گے۔وزیر اعظم اس موقع پر پردھان منتری آیوشمان ویے وندنا یوجنا، راشٹریہ آجیویکا مشن اور پردھان منتری سوریہ گھر مفت بجلی یوجنا کے استفادہ کنندگان کو سرٹیفکیٹ اور چیک بھی تقسیم کریں گے۔
