محمد تسکین
بانہال // سب ڈویژن بانہال کے دور دراز علاقہ منگت میں رونما ہوئی آگ کی ایک ہولناک واردات میں ایک تین منزلہ رہائشی مکان مال و اسباب سمیت خاکستر ہوگیا۔صبح قریب گیارہ بجے نمودار ہوئی آگ کی اس واردات میں پانچ کنبے بے گھر ہوگئے ہیں ۔آگ کی خبر ملتے ہی ایس ڈی پی او بانہال منجیت سنگھ ، فائر سروسز کا عملہ ، فوج کی راشٹریہ رائفلز کے جوان ، انچارج چوکی افسر کھڑی پولیس ، این جی او بانہال والنٹیئرز اور کیو آر ٹی کھڑی کے رضاکار جائے واقع پر پہنچے گئے اور انہوں نے آگ کو مزید پھیلنے سے روکنے میں مدد کی تاہم وہ آگ کی لپیٹ میں آئے مکان کو بچا نہیں سکے۔مقامی لمبردار محمد یوسف نے کشمیر عظمیٰ کو بتایا کہ بانہال سے قریب بائیس کلومیٹر دور اور پہاڑی علاقہ ہونے کی وجہ سے فائر سروس کو پہنچنے میں ایک گھنٹے کا وقت لگا اور تب تک یہ تین منزلہ عمارت اناج ، بستروں اور دیگر گھریلو سامان سمیت جل کر راکھ ہوگئی تھی تاہم بچاؤ ٹیموں نے آگ کو مزید پھیلنے سے روکا ۔ انہوں نے کہا کہ دس کمروں پر مشتمل اس عمارت میں پانچ کنبے رہائش پذیر تھے اور تمام کنبے خطہ افلاس سے نیچے زندگی بسر کر رہے ہیں ۔انہوں نے کہا کہ اس واقعہ میں ولی محمد ، جمال الدین ، محمد شفیع ، محمد اسحاق اور محمد سلطان کے کنبوں کا کچھ بھی سامان باقی نہیں بچا اور وہ آگ کی اس بھیانک واردات میں تن پر لگے کپڑوں کے سوا کچھ نہیں بچا سکے۔ اس سلسلے میںتحصیلدار کھڑی ہرویر سنگھ نے کشمیر عظمیٰ کو بتایا کہ آگ کی اس واردات کی خبر ملتے ہی پہلے علاقے میں موجود فوج کو آگ بجھانے والے آلات لیکر ، پولیس اور فائر سروسز کو علاقے کی طرف روانہ کیا گیا اور آس پاس کے رہائشیوں کو گھروں سے باہر محفوظ مقام کی طرف منتقل کیا گیا ۔ انہوں نے کہا کہ اُن کے نائب تحصیلدار نے علاقہ منگت میں آگ سے ہوئے نقصانات کا جائزہ لینے کے بعد نقصانات کی ایک رپورٹ انہیں بھیجی ہے۔ انہوں نے کہا کہ کاغذی لوازمات مکمل کرکے آتشزدگی سے ہوئے نقصانات کی یہ رپورٹ ڈپٹی کمشنر رام بن بصیر الحق چودھری کو روانہ کی جارہی ہے تاکہ متاثرین کی ڈیزاسٹر مینجمنٹ فنڈ سے مدد کی جا سکے۔انہوں نے کہا کہ انتظامیہ لوگوں کے ساتھ ہے اور ہر ممکن مدد کی کوشش کی جائے گی ۔
بانہال والنٹیئرز نے راشن اور خورد و نوش کا سامان فراہم کیا
محمد تسکین
بانہال// غیر سرکاری تنظیم بانہال والنٹیرز کے رضاکاروں نے منگت کے آگ سے متاثرہ ہوئے پانچ کنبوں میں ضروری راشن تقسیم کیا۔بانہال والنٹیرز کے بانی اور صدر ادریس احمد وانی نے منگت سے فون پر کشمیر عظمیٰ کو بتایا کہ ان کی ٹیم پولیس اور فائر اینڈ ایمرجنسی بانہال کے ہمراہ بچاؤ کاروائیوں کیلئے بانہال سے 22کلومیٹر دور پہاڑی علاقہ منگت پہنچی تھی لیکن ہمارے پہنچنے تک یہ تین منزلہ رہائشی مکان مکمل طور سے خاکستر ہوگیا تھا تاہم فائر سروس پولیس ، مقامی لوگوں اور بانہال والنٹیرز کی بچاؤ ٹیموں آگ کو بستی کے دیگر گھروں تک پہنچنے سے پہلے ہی قابو کیا ۔ انہوں نے کہا آگ کی اس واردات میں اس رہائشی مکان میں رہنے والے پانچ کنبے زمین پر آگئے ہیں۔ انہوں نے کہا کہ موقع کی نزاکت دیکھتے ہوئے بانہال والنٹیئرز نے پانچوں کنبوں کیلئے ضروری راشن اور خوردو نوش کا انتظام کیا اور مزید مدد کی کوششں کی جائے گی ۔ انہوں نے عوام الناس سے اپیل کی کہ وہ منگت آتشزدگی متاثرین کی ہر ممکن مدد کیلئے بانہال والنٹیرز سے تعاون کریں یا از خود منگت کے متاثرین کی براہ راست مدد کیلئے سامنے آئیں تاکہ برفباری سے پہلے پہلے ان کے آشیانوں کا کوئی انتظام کیا جاسکے ۔
