نیوز ڈیسک
جموں//لیفٹیننٹ گورنر منوج سِنہا نے آج کنونشن سینٹر میں جموںوکشمیر بھارت سکائوٹس اینڈ گائیڈز کی راجیہ پُر سکار تقریب میں شرکت کی۔لیفٹیننٹ گورنر جو جموںوکشمیر بھارت سکائوٹس اینڈ گائیڈز کے چیف سرپرست بھی ہیں، نے راجیہ پُر سکار ایوارڈ یافتہ سکائوٹس اینڈ گائیڈز کو مبارک باد دی اور معاشرے میں ان کے رول کی ستائش کی۔لیفٹیننٹ گورنر نے کہا،’’اَپنے پُر اُمید نظریۂ سے سکائوٹس اینڈ گائیڈز بالخصوص کمیونٹی کے کمزور طبقے کی خدمت کر کے نوجوانوںکو تبدیلی لانے کے قابل بنا کر معاشرے میں تبدیلی کی قیادت کر رہے ہیں۔‘‘
لیفٹیننٹ گورنر نے کہا،’’ نوجوان تبدیلی کی کلید ہے اور آج وہ دیرپا اِقتصادی ترقی اور سماجی ہم آہنگی میں بڑا کردار اَدا کرنے کے خواہشمند ہیں ۔بے لوث خدمت کے اَپنے عزم سے سکائوٹس اینڈ گائیڈز ایک جامع اور خوشحال معاشرے کی تعمیر میں اَپنا حصہ اَدا کر رہے ہیں۔‘‘ اُنہوں نے مزید کہا کہ مقامی اِنتظامیہ کے ساتھ شراکت داری میں اُنہیں حکومت کی کوششوں کی تکمیل کے لئے سماجی بہبود کے کاموں میں مشغول ہونا چاہیے اور پُر امن ، مساوی اور اِنصاف پسند کمیونٹیوں کو فروغ دینے کے لئے نوجوانوں کے نئے نیٹ ورکس تیار کرنا چاہیے۔لیفٹیننٹ گورنر نے ٹرینروں اور ٹیچنگ کمیونٹی پر بھی زور دیا کہ وہ نوجوانوں میں اِنفرادی ترقی اور قائدانہ خصوصیات کو پروان چڑھائیں۔اُنہوں نے کہا ،’’ نوجوان مستقبل کے اہم شراکت دار ہیں اور یہ ہماری اِجتماعی ذمہ داری ہے کہ انہیں ان کی صلاحیتوں کو پورا کرنے اور ترقی کے عمل میں اُن کی شمولیت کو مضبوط کرنے کے مواقع فراہم کریں۔‘‘لیفٹیننٹ گورنر نے جموںوکشمیر بھارت سکائوٹس اینڈ گائیڈز سے کہا کہ وہ منشیات کے اِستعمال کی روکتھام کے پروگراموں میں فعال طور پر تعاون کریں۔اُنہوں نے جموں وکشمیر بھارت سکائوٹس اینڈ گائیڈز کے کاموں کو آسان بنانے کے لئے جموںو کشمیر یوٹی اِنتظامیہ کے عزم کو بھی دہرایا۔اِس موقعہ پر لیفٹیننٹ گورنر نے مختلف سکولوں کے سکائوٹس اینڈ گائیڈز کو راجیہ پُر سکار ایوارڈ اسناد سے نوازا۔
