منشیات کی فصلیں تباہ کرنے کا موزون وقت !

خالی زمینوں پر قدرتی طور پر بھنگ کی فصلیں اُگ آنے کا موسم اس وقت عروج پر ہے اور شاہراہوں، سڑکوں، دریائوں اور ندی  نالوں کے کناروں پر اس قبیح شے کے لہلہاتے پودے دیکھنا ایک عام نظارے کی حیثیت رکھتا ہے۔ پولیس اور ضلعی انتظامیہ نے یہ فصلیں تباہ کرنے کےلئے پوری وادی میں مہم شروع کی ہے، جو ایک خوش آئند قدم ہے۔ تاہم یہ بات بھی اپنی جگہ غور طلب ہے کہ ور دراز دیہات اور پہاڑی خطوں میں فی الوقت ایک منظم مافیا  یہ کام چلا رہا ہے،  جس سے نمٹنے کے لئے منظم ، ہمہ گیر اور سریع کاروائی کی ضرورت ہے۔ متعلقہ محکموں کو  ایسی اراضی کی نشاندہی کرکے اسے معلن کرنا چاہئے نیزاس مہم کےلئے حساس اور ذمہ دارمقامی سماجی  حلقوں سے تعاون حاصل کرنے کو بھی ترجیح دینی چاہئے۔منشیات کے استعمال کی وجہ سے مختلف اقسام کے جرائم میں زبردست اضافہ ہو رہا ہے اور اس صورتحال نے سماج کے تاروپود کو ہلا کر رکھ دیا ہے۔ منشیات کے کاروبار کا فروغ اس وقت ساری دنیا میں سماجی ڈھانچوں کی شکست وریخت کا ایک بہت بڑا سبب بنا ہوا ہے اور امریکہ جسے سُپر پاور ملک میں بھی اس وباء کی وجہ سے سماجی تانے بانے بکھر رہے ہیں، جبکہ لاطینی امریکہ،براعظم افریقہ اورجنوبی ایشیا میں میں متعدد ممالک اس میں ملوث مافیا کے ہاتھوںتاخت و تاراج ہو چکے ہیں، کیونکہ اکثر اس کاروبار سے ارب پتی بننے والے لوگ مختلف راہوں سے سیاسی اقتدار واختیار کی قربت حاصل کرکے بالآخر فیصلہ سازوںکا روپ دھار لیتے ہیں۔ اس طرح عوامی رائے اور سوچ کو انکی سوچ کے تابع بنا دیا جاتا ہے۔ ایسے خوفناک خطرات کے بیچ ہماری انتظامیہ ، سماج ، دینی و سماجی ادارے خواب خرگوش میں ہیں، جبکہ ڈور ہاتھوں سے تیزی کے ساتھ چھوٹتی جارہی ہے۔ہماری ریاست ،میں جہاں تقریباً40فیصد غذائی اجناس بیرونِ ریاست سے درآمد کئے جاتے ہیں، زرعی اراضی کا ایک بھاری حصہ منشیات کی کاشت کے لئے استعمال ہوتاہے اورعام طور پر یہ سب کارروائی انتظامیہ کی ناک کے نیچے دن کی روشنی میں انجام پاتی ہے۔ منشیات کی کاشت کوئی چند گھنٹوں یا دنوں کے دوران ہیر پھیر کی کارروائی کا معاملہ نہیں ہے بلکہ اسکی کاشت میں ایک مکمل فصلی موسم درکارہوتاہے۔ اس دوران انتظامیہ کے متعلقہ محکمے کہاں نیند میں پڑے رہتے ہیں،یہ ایک بہت بڑا سوال ہے۔ ریاست میںسماج کو اندر ہی اندر سے دیمک کی طرح چاٹنے والے اس دھندے کے لئے کتنی مقدار میں زرعی اراضی استعمال ہورہی ہے اس کے متعلق مختلف محکموں کے پاس موجود اعداد وشمار نہ صرف متضاد ہیں بلکہ مشکوک بھی ہیں۔ لیکن اتنا تو طے ہے کہ ہزاروں کنال اراضی پر منشیات کی کاشت ہوتی ہے ، جس سے اربوں روپے مالیت کی مختلف منشیات تیار کی جاتی ہیں ۔ایسا کیوں ہے؟اس بحث میں پڑے بغیر منشیات کے زیرکاشت اراضی کاحجم بذات خود ایک انتہائی تشویشناک امرہے کیونکہ اس زمین سے اْگنے والا زہرصرفے کے لئے بالآخر سماج میں ہی راہ پاتاہے ، جس سے نسلوں کی نسلیں برباد ہوجاتی ہیں۔ یہ فصلیں کاشت کرنے اور ان کی پرورش وپرداخت کیلئے وہی محنت جو کہ ایک حلال فصل کے لئے ضرورت ہوتی ہے ، اْٹھائی جاتی ہے ، اْس  سارے عرصہ میں متعلقہ محکموں کی جانب سے کبھی عوام کو کسی قسم کی معلومات فراہم نہیں کی جاتیں۔ کیا یہ دانستہ عمل ہے یا پھر انتظامیہ اْسی وقت جاگتی ہے ،جب یہ زہر لہلہانے لگتاہے۔ انتظامیہ کی جانب سے بھی غالباً متعلقہ محکموں سے یہ جواب طلب کرنے کی زحمت گوارا نہیں کی جاتی ہے کہ ایک مکمل فصلی موسم کے دوران اس انسان دشمن کام کے خلاف کارروائی کیوں نہیں کی جاتی ؟ ۔اس وقت غذائی اجناس کے حوالے سے ریاست کو جس کمی کا سامناہے ماہرین کے مطابق اس مذکورہ رقبہ سے اس قدر اجناس حاصل کئے جاسکتے ہیں کہ یہ تفاوت دس فیصد تک کم ہوسکتاہے۔ یہ کسی بھی مہذب قوم کے شایان شان نہیں کہ وہ حلال اجناس کی قلت کے ہوتے ہوئے حرام اجناس پیدا کرنے پر اپنی قوتیں صرف کرے، جس سے نہ صرف سماج کی بنیادیں کھوکھلی ہورہی ہیں ، بلکہ نئی نسل تیزی کے ساتھ تباہی کی کگارکی جانب پہنچ رہی ہے۔سماج کے اندر پنپنے والی بے شمار بیماریوں کا سبب اس دھندے سے حاصل ہونے والی غیر قانونی دولت ہے ، جو سماجی کو ایک نئی اور خطرناک طبقاتی کشمکش کی جانب دھکیل رہی ہے۔ اس خوفناک صورتحال پر فوراً جاگنے کی ضرورت ہے۔اس وقت چونکہ یہ فصلات لہلا رہی ہیں، لہٰذاانتظامیہ کے لئے بیدار ہونے کا وقت ہے۔ چونکہ دیکھنے میں آیا ہے کہ اگست اور ستمبر کے مہینے میں منشیات کی یہ فصلیںپک کر کاٹنے کے لائق ہو جاتی ہیں، لہٰذا انتظامیہ کےلئے بیدار ہونے کا وقت ہے اور بڑے پیمانے پر منظم طریقے سے انہیں تباہ کرنے کی کاروائی کرنے کی ضرورت ہے۔ مگر اسی پر اکتفا کرنا شاید درست نہ ہوگا بلکہ اس مافیا کو بے نقاب کرکے کیفر کردار تک پہنچانے کی ضرورت ہے، جو اس منظم کاروائی کے پشتی بان ہیں۔