منشیات کا استعمال… معاشی اور جغرافیائی جہتیں معاشرتی بگاڑ اور معاشی زوال سے بچنے کی سبیل کریں

زاویہ نگاہ

پروفیسر گیر محمد اسحاق

پورے ملک کا بالعموم اور جموں و کشمیر کا بالخصوص ٹرانزٹ روٹ کے طور پر کام کرنے اور اس کے نتیجے میں منشیات اور سائیکو ٹراپک مادوں کے ہاٹ سپاٹ کا خطرہ اس حقیقت سے عیاں ہوتا ہے کہ ہمارا ملکGolden Crescent Nations (غیرقانونی منشیات سمگلنگ کی سُوپر ہائی ویز )بشمول ایران، پاکستان اور افغانستان اورGolden Triangle Countries (منشیات کی آماجگاہ والے مثلث ممالک )بشمول میانمار، تھائی لینڈ اور ویتنام جیسے ممالک، جو کہ تاریخی طور پر صدیوں سے افیون کی کاشت کے مرکز رہے ہیں،کے درمیان موجود ہے۔

اگرچہ بھارت کو ایک طویل عرصے سے منشیات کے سمگلروں کے ذریعہ ٹرانزٹ روٹ کے طور پر استعمال کیا جا رہا تھا، لیکن حالیہ دنوں تک وہ خود اس لعنت سے اچھوتا رہا لیکن اب ایسا نہیں ہے۔اب منشیات سمگلروںکے بڑھتے ہوئے لالچ کے نتیجے میں بدقسمتی سے یہ ٹرانزٹ روٹ سے منشیات اور غیر قانونی منشیات کی منزل میں تبدیل ہو گیا ہے حالانکہ حکومت ہند اس لعنت کا آہنی ہاتھوں سے مقابلہ کر رہی ہے اور اسے جڑوں سے ختم کرنے کیلئے تمام ضروری اقدامات کررہی ہے۔یہ خطرہ خاص طور پر شمالی سرحدی ریاستوں جیسے پنجاب، ہریانہ، راجستھان اور دیر سے جموں و کشمیر یوٹی میںخطرناک حد تک بڑھ رہا ہے۔

پہلے پنجاب کو منشیات کی لت میں نمبر 1 ریاست سمجھا جاتا تھا لیکن دستیاب اعداد و شمار کے مطابق ایسا لگتا ہے کہ اب جموں و کشمیر نے پنجاب کی جگہ لے لی ہے کیونکہ ہمارے پاس 10 لاکھ سے زیادہ منشیات کے عادی ہیں جن میں سے نیشنل ڈرگ ٹریٹمنٹ سنٹرغازی آباد (این ڈی ڈی ٹی سی)، ایمز نئی دہلی کے ذریعہ کرائے گئے سروے کے مطابق60000 سے زیادہ خواتین ہیں۔

پہلے منشیات کا استعمال معاشرے کے نچلے طبقوں سے تعلق رکھنے والے ان پڑھ لوگوں کا پسندیدہ مشغلہ سمجھا جاتا تھا جو اکثر چرس، بھنگ، گانجہ اور نیند کی گولیوں کا سہارا لیتے تھے لیکن اب اس قسم کے طبقاتی فرق بھی جائز نہیں رہے۔اس وقت منشیات کے عادی افراد کا تعلق متنوع پیشوں، دیہی اور شہری اختلاف، ملازمت کے ساتھ ساتھ بے روزگاری، مذہبی عقائد اور نسلی بنیادوں سے قطع نظر ہر عمر کے گروہوں، تمام جنسوں، معاشرے کے تمام طبقات سے ہے۔ 90فیصد سے زیادہ منشیات کا استعمال کرنے والے اب انجیکشن والی منشیات کا استعمال کرتے ہیں جیسے ہیروئن اور نسخے کے منشیات کے استعمال کی جگہ اب بڑی حد تک ہیروئن اور کوکین نے لے لی ہے۔

نارکوٹکس کنٹرول بیورو آف انڈیا کی جانب سے ہیروئن، کوکین، ایل ایس ڈی (لائسرجک ایسڈ ڈائی اتھیلامائیڈ)، ایم ڈی ایم اے (میتھائلین ڈی آکسی میتھامفیٹامائن)، سی بی سی ایس (کوڈین پر مبنی کھانسی کے بوتل )دیگر ایمفیٹامائن جیسے محرکات، جیسے سخت ادویات کے ضبطی میں تعداد اور مقدارکے لحاظ سے بے تحاشا اضافہ دیکھا گیا ہے۔

ڈرگ اینڈ فوڈ کنٹرول آرگنائزیشن جموں و کشمیر نے بھی حالیہ دنوں میں ٹرانسپورٹ ور کورئیر ایجنسیوں، ہوٹلوں، دکانوں وغیرہ پر چھاپوں کے ایک سلسلہ میں بڑی مقدار میں ٹیپینٹاڈول، سپاسمو پراکسیوان، ٹراماڈول، کوڈین اور دیگر نسخے کی دوائیاں ضبط کی ہیں جن کی مالیت لاکھوں روپے ہے۔

آل انڈیا انسٹی ٹیوٹ آف میڈیکل سائنسز (ایمز) نئی دہلی کے نیشنل ڈرگ ڈیپنڈنس ٹریٹمنٹ سنٹر (این ڈی ڈی ٹی سی) کے ذریعے سماجی انصاف اور بااختیار بنانے کی وزارت کے ذریعہ ہندوستان میں مادوں کے استعمال کی حد اور طرز پر قومی سروے کے مطابق جموںوکشمیر میںتقریباً 10 لاکھ منشیات کے عادی افراد ہیں جن میں 108000 مرد اور 36000 خواتین بھنگ کے عادی ہیں جبکہ 534000 مرد اور 8000 خواتین اوپیائیڈز کی عادی ہیں اور 160000 مرد اور 8000 خواتین مختلف قسم کی سکون آور ادویات استعمال کر رہی ہیں۔اس سروے کے دوران جموں و کشمیر میں 127000 مرد اور 7000 خواتین دم کشی کا استعمال کرتے ہوئے پائے گئے اور بڑی تعداد میں مرد و خواتین جموں و کشمیر میں کوکین، ایمفیٹامین قسم کے محرکات (اے ٹی ایس) اور ہیلوسینوجنز کے عادی تھے۔

مزید برآں وزارت نے پارلیمنٹ میں ایک سوال کے جواب میں اطلاع دی ہے کہ ملک بھر کے سرکاری ہسپتالوں میں قائم کردہ 46 ایڈکشن ٹریٹمنٹ فیسیلٹیز (ATFs) میں سے 10 جموں و کشمیر یوٹی ں چل رہی ہیں۔ اسی طرح 340انٹیگریٹیڈ بحالی مراکز (IRCs) میں سے10جموںوکشمیرمیں قائم کیے گئے ہیں، جو علاج اور معاون خدمات فراہم کرتے ہیں جیسے احتیاطی تعلیم، آگاہی مہم، تحریکی مشاورت، detoxification/addiction۔de، دیکھ بھال اور منشیات کے عادی افراد کا سماجی دھارے میں دوبارہ انضمام شامل ہے۔

اسی طرح 40 کمیونٹی پر مبنی بزرگوں کی نگرانی میں چلنے والے انٹرونشن مراکز(CPLI)، جو کمزور اور خطرے سے دوچار بچوں اور نوعمروں پر توجہ مرکوز کرتے ہیں اور ایسے بچوں کو ہم عمر اساتذہ کے ذریعے بیداری پیدا کرنے اور زندگی کی مہارت کی سرگرمیوں کیلئے مشغول کرتے ہیں،میں سے دو جموں و کشمیر میں چل رہے ہیں۔ مستقبل میں جموں و کشمیر میں ان اہم مراکز کو یقینی طور پر بڑھانے کی ضرورت ہے۔ مزید برآں، جموں و کشمیر میں ایسے 71 مراکز میں سے تین آؤٹ ریچ اینڈ ڈراپ ان سینٹرز (ODICs) ہیں جو وزارت کے ذریعے پورے ہندوستان میں قائم کیے گئے ہیں تاکہ منشیات کاستعمال کرنے والوں کیلئے سکریننگ، تشخیص اور مشاورت کی فراہمی کے ساتھ علاج اور بحالی کی محفوظ جگہ فراہم کی جا سکے اور اس کے بعد نشہ آور اشیا کیلئے علاج اور بحالی کی خدمات کا ریفرل اور ربط فراہم کریں۔

حکومت ہندوستان ملک بھر کے ان اضلاع میں جہاں IRCA، ODIC اور CPLI مراکز نہیں ہیں،وہاں ڈسٹرکٹ ڈی ایڈکشن سینٹرز (DDACs) کے قیام کی بھی مالی معاونت کرتی ہے۔ اس وقت15 ایسے ڈسٹرکٹ ڈی ایڈکشن سینٹر وزارت کے ذریعے چل رہیے ہیں جن میں سے تین سے پانچ جموں و کشمیر میں ہیں۔

وزارت داخلہ نے منشیات کی لعنت سے متعلق ایک سوال کے جواب میں لوک سبھا کو بتایا کہ نارکوٹکس کنٹرول بیورو (این سی بی) نے 2018 میں جموں و کشمیر میں 288 ایکڑ اراضی، 2019 میں 1123 ایکڑ، 2020 میں 893 ایکڑ، 2021 میں 292 ایکڑ اور 2022 میں 88ایکڑ اراضی پر پوست کو تلف کیا۔ سرکاری اعداد و شمار سے پتہ چلتا ہے کہ حکومت کاشت شدہ بھنگ کی تباہی سے متعلق کارروائیوں میں سال 2018 سے اوپر کا رجحان ظاہر ہوا ہے جب 37 ایکڑ اراضی پر بھنگ کو تلف کیا گیا تھا جس کے بعد 2020 میں 295 ایکڑ، 2021 میں 523 ایکڑ اور 2022 میں 443 ایکڑ اراضی پر بھنگ کو تلف کیا گیا تھا۔

واقعات کے ایک انتہائی خوفناک اور خطرناک موڑ میں حکومت صدر ہسپتال سرینگرمیں قائم منشیات سے چھٹکارا مرکز میں 2016-2017 سے اب تک مریضوں میں 945 فیصد اضافہ ریکارڈ کیا گیا ہے۔اپریل 2016 سے مارچ 2017 کے درمیان مجموعی طور پر 489 مریضوں نے اس کی او پی ڈی کا دورہ کیا، اگلے 12 مہینوں میں 3622 اور اس کے بعد کے 12 مہینوں میں 5113 مریض آئے، اس طرح مختصر عرصے میں مریضوں کی تعداد میں 1000 فیصد اضافہ ہوا۔ اپریل اور جون 2019 کے درمیان تقریباً 1095 مزید مریض اس سہولت کا دورہ کر چکے ہیں۔ مرکز میں داخل منشیات کے عادی افراد کی کل تعداد کا بھی یہی حال ہے۔ 2014 میں 116 مریضوں سے، یہ تعداد ہر اگلے سال سے بڑھی ہے۔ 2015 میں 203، 2016 میں 207، 2017 میں 374 اور 2018 میں 624 تک یہ تعداد پہنچ چکی ہے۔

یہ تمام اعداد و شمار ایک انتہائی سنگین منظر نامہ پیش کرتے ہیں جو معاشرے کے تمام طبقوں اور سٹیک ہولڈروں کو گہری نیند سے بیدار کرنے، ان کے دل و دماغ کو ایک ساتھ رکھنے اور اس لعنت کو روکنے کیلئے ایک مؤثر اور فول پروف میکانزم تیار کرنے کیلئے کافی خطرے کی گھنٹی کا کام کرتے ہیں۔چونکہ مسئلہ کثیر جہتی ہے، اس لئے اکیلے کثیر جہتی نقطہ نظر ہی بھڑکتی ہوئی آگ کو بجھانے میں مددگار ثابت ہو سکتا ہے۔ 17 جولائی 2023 کو نئی دہلی میں “منشیات کی سمگلنگ اور قومی سلامتی” پر ایک علاقائی کانفرنس کی صدارت کرتے ہوئے مرکزی وزیر داخلہ امت شاہ نے اعلان کیا کہ نارکوٹکس کنٹرول بیورو نے تمام ریاستوں کی اے این ٹی ایف کے ساتھ مل کر ملک کے مختلف حصوں میں ایک ہی سال میں تقریباً 12000 کروڑ روپے مالیت کی دس لاکھ کلو گرام سے زیادہ نشہ آور ادویات کو تباہ کیا ہے اور اعلان کیا کہ منشیات سے پاک ہندوستان کا خواب شرمندہ تعبیر کرنے کیلئے منشیات کو تباہ کرنے کی مہم مستقبل میں بھی فعال طور پر جاری رہے گی۔تباہ کی گئی منشیات میں این سی بی کی جموں برانچ کے ذریعے تباہ کی گئی 356 کلوگرام بھی شامل ہیں (اے این آئی نیوز 17 جولائی 2023)۔ یہ حکومت کی جانب سے آنے والے برسوں میں اس لعنت کو ختم کرنے کے حکومت ِ ہندوستان کے پختہ عزم کو ظاہر کرتا ہے ۔

جہاں تک اس عفریت کے پیچھے اقتصادیات کا تعلق ہے توانسٹی ٹیوٹ آف مینٹل ہیلتھ اینڈ نیورو سائنسز (IMHANS)، گورنمنٹ میڈکل کالج سری نگر کے ذریعہ کئے گئے ایک مطالعہ، جس کا عنوان ’’کشمیر کے 10 اضلاع میں مادہ کے استعمال کا پھیلاؤ اورطریقہ کار‘‘ہے،کے مطابق’’9لاکھ روپے مالیت کی ہیروئن،ایک لاکھ روپے کی بھنگ اور 1.30 لاکھ روپے کی فارماسیوٹیکل اوپیائیڈز ہر ماہ استعمال کی جا رہی ہیں‘‘۔ IMHANS کے اعداد و شمار سے یہ بھی پتہ چلتا ہے کہ صرف سال 2022 میں 41,110 افراد نے کشمیر میں منشیات کے استعمال کیلئے علاج کی کوشش کی جو کہ 2021 (23,403) میں علاج کرانے والے لوگوں کی تعداد سے دوگنا ہے اور یہ پایا گیا کہ ہیروئن کے عادی افراد اوسطاً کشمیر میں اس منشیات پر ماہانہ 88,000 روپے خرچ کرتے ہیں جس کا مطلب ہے کہ ہر عادی ہر ماہ ہیروئن پر تقریباً 10 لاکھ روپے خرچ کرتا ہے۔

ان معیارات کے مطابق منشیات کی صنعت جموںوکشمیرمیں ملٹی ملین انڈسٹری معلوم ہوتی ہے۔ اس مطالعہ نے سرینگر اور اننت ناگ کے دو اضلاع میں ہیروئن کے استعمال کے معاشی بوجھ کا اندازہ بھی لگایا ہے جو کہ پھیلاؤ اور ایکسٹراپولیشن کے نتائج کی بنیاد پر ہے۔مطالعہ میںکہاگیاہے’’سرینگر اور اننت ناگ کے دو اضلاع میں افیون کے استعمال پر خرچہ 3,74,90,329 روپے ہے‘‘۔ لہٰذا، بڑی مقدار میں سائیکو ٹراپک مادوں کی ضبطی کے پیش نظر جموںوکشمیر میں DFCO کی طرف سے اور نارکوٹکس کنٹرول بیورو آف انڈیا کی طرف سے ملک بھر میں حالیہ ماضی میں، غیر قانونی منشیات کی سپلائی چینلز پر بڑے پیمانے پر کریک ڈاؤن موجودہ حالات میں ناگزیر معلوم ہوتا ہے۔

حکومت ہندنے حالیہ دنوں میں منشیات سمگلروں اور تاجروں کے خلاف سخت کارروائی کی ہے اوراس طرح کی گھناؤنی کارروائیوں کیلئے صفر رواداری کا مظاہرہ کیا ہے اور غیر قانونی تجارت میں ملوث پائے جانے والوں کو سخت سزائیں بھی دی ہیں۔ اس طرح کی سخت گیر مہموں کو مستقبل میں زیادہ رفتار اور تعدد کے ساتھ مستقل بنیادوں پر جاری رکھنے کی ضرورت ہے ۔(ختم شد)
(مضمون نگار کشمیر یونیورسٹی کے شعبہ فارماسیوٹیکل سائنسز میں پڑھاتے ہیں اور یونیورسٹی کے سینٹر فار کیرئیر پلاننگ اینڈ کونسلنگ کے ڈائریکٹر کا اضافی چارج بھی رکھتے ہیں۔)
(نوٹ۔ اس مضمون میں ظاہر کی گئی آراء مضمون نگار کی خالصتاً اپنی آراء ہیں اور انہیں کسی بھی طور کشمیر عظمیٰ سے منسوب نہیں کیاجاناچاہئے۔)