عظمیٰ نیوز سروس
جموں//بی جے پی کے سینئر لیڈر دیویندر سنگھ رانا نے قدیم ورثے کے مندروں اور مزارات کی قدیم شان کو بحال کرنے پر زوردیتے ہوئے کہاکہ اس عمل سے لوگ روحانیت اور تہذیب سے جڑے رہ سکتے ہیں۔شری ماتا ویشنو دیوی جی پراچین مارگ شرائن سنستھا کے ایک وفد کے ساتھ بات چیت کرتے ہوئے رانا نے نگروٹہ میں کول کنڈولی مندر سے شری ماتا ویشنو دیوی غار کی عبادت گاہ تک قدیم وراثتی راستے کو فروغ دینے میں ان کی انتھک کوششوں کے لئے دفتر کی ستائش کی۔بھاجپا سنیئر لیڈر نے کہا کہ ’’یہ راستہ ملک اور بیرون ملک سے آنے والے عقیدت مندوں کو ایک اضافی روحانی خوشی دے گا اور جموں کی معیشت کو نئی تحریک دے گا‘‘۔رانا نے تمام اہم ورثے کے اثاثوں جیسے قدم کنواں، تالاب، سرائیوں، کنوئیں، مندروں اور پگڈنڈیوں کے ساتھ چشموں کی ماہرین کی طرف سے تفصیلی نقشہ سازی کے بعد اس راستے کو بہترین طریقے سے تلاش کرنے کے لئے برسوں سے کی جانے والی کوششوں پر روشنی ڈالی ۔انہوں نے کہاکہ یہ راستہ قومی شاہراہ1اے پر کول کنڈولی (نگروٹہ) سے شروع ہوتا ہے اور جگدمبا ماتا کھیر بھوانی مندر، جگتی، درگا ماتا مندر ، پنگالی، شیو مندر ، ٹھنڈاپانی ، درابی، شیو شکتی مندر، راجہ منڈلیک مندراور راجہ نوالگر سے گزرتا ہے۔ انہوں نے مزید کہا کہ اس راستے کو بحال کرنے سے، عقیدت مند اس روشن خیالی کے ساتھ ماتا کے دربار پر سجدہ کرنے کے بعد گھر واپس جا سکتے ہیں جس کی وہ ساری زندگی تلاش کرتے رہے ہیں۔بھاجپا لیڈر نے کہاکہ یاترا کے روحانی پہلو کے علاوہ، پراچین مارگ کا فروغ جموں کو توجہ کے دائرے میں لائے گا اور شہر سے لے کر غار کے مزار تک کے اطراف کی معیشت کو بدل دے گا۔ انہوں نے مزید کہا کہ یاتریوں کی سیاحت نے جموںو کشمیر کی معیشت کو برقرار رکھا ہے۔رانا نے یاتری مقامات سے متعلق مختلف منصوبوں کو عملی جامہ پہنانے کے لئے فعال نقطہ نظر کی ضرورت پر زور دیتے ہوئے کہا کہ قدیم لنک، پرسکون ماحول اور روحانی ماحول سے گزرتے ہوئے روحانی سکون اور کئی قابل احترام مندروں کے درشن فراہم کرتا ہے جو یاترا پر نکلنے سے پہلے سے ضروری ہوتا تھا۔
