عظمیٰ نیوزسروس
ملواڑون // ایم ایل اے اندروال پیارے لعل شرما نے ملواڑون گاؤں کا دورہ کیا تاکہ آگ کے ہولناک واقعہ کے بعد صورتحال کا جائزہ لیا جاسکے جس میں کئی مکانات تباہ ہو گئے۔ اپنے دورے کے دوران انہوں نے متاثرہ خاندانوں سے بات چیت کی اور انہیں ان کی آباد کاری کے لیے حکومت کی جانب سے مکمل تعاون کا یقین دلایا۔شرما نےاپنے گھروں سے محروم ہونے والوں کی طویل مدتی بحالی کیلئےفوری ریلیف فراہم کرنے کے حکومت کے عزم پر زور دیا۔ انہوں نے لوگوں کو یقین دلایا کہ متاثرہ خاندانوں کی بازیابی کے عمل کو تیز اور موثر بنانے کے لیے تمام ضروری اقدامات کیے جائیں گے۔ایم ایل اے نے گاؤں والوں کے ساتھ اپنی یکجہتی کا اظہار کیا اور امدادی اقدامات کو تیز کرنے کے لیے مقامی حکام کے ساتھ رابطہ قائم کرنے کا وعدہ کیا۔
آتشزدگی سانحہ پر سروری کا اظہار افسوس
عظمیٰ نیوزسروس
کشتواڑ// سابق وزیر غلام محمد سروری نے ضلع کشتواڑ کے واڑوان علاقے کے گاؤں ملواڑون میں پیش آنے والے افسوسناک واقعے پر گہرے دکھ کا اظہار کیا ہے، جہاں اچانک آگ لگنے سے تقریباً 70 گھر مکمل طور پر جل کر خاکستر ہو گئے۔ اس افسوسناک حادثے کے نتیجے میں مقامی لوگ اپنے تمام ساز و سامان سے محروم ہو کر کھلے آسمان تلے آ گئے ہیں۔سروری نے کہا کہ علاقے میں کوئی فائر سروسز کی سہولت نہ ہونے کی وجہ سے اس طرح کے واقعات سنگین نتائج کا سبب بنتے ہیں۔ انہوں نے حکومت کی نااہلی پر تنقید کرتے ہوئے کہا کہ ہر سال ضلع کشتواڑ میں آگ لگنے سے لاکھوں کروڑوں کا نقصان ہوتا ہے، لیکن اس کے باوجود انتظامیہ کی جانب سے کوئی عملی اقدامات نہیں اٹھائے گئے ہیں۔سروری نے اس واقعے کے حوالے سے کہا کہ کشتواڑ جیسے دشوار گزار علاقوں میں فوری امداد کے لیے کاپٹر سروس کی ضرورت ہے تاکہ آگ کے واقعات پر جلد قابو پایا جا سکے۔غلام محمد سروری نے جموں و کشمیر کے لیفٹیننٹ گورنر منوج سنہا سے اپیل کی ہے کہ وہ خودملواڑون، انشن کا دورہ کریں اور متاثرین کی امداد کے لیے فوری اور معقول اقدامات اٹھائیں۔ انہوں نے مطالبہ کیا کہ آگ سے متاثرہ خاندانوں کی بازآبادکاری کے لیے فوری اقدامات کیے جائیں اور انہیں جلد از جلد مالی و دیگر ضروری امداد فراہم کی جائے۔ انہوں نے انتظامیہ سے مطالبہ کیا کہ آگ سے متاثرہ لوگوں کی ہر ممکن مدد کی جائے اور ان کی بازآبادکاری کے حوالے سے جامع منصوبہ بندی کی جائے۔
