عظمیٰ نیوزڈیسک
ممبئی//ہندوستان کے مغربی اور مشرقی حصوں میں مانسون کا اثر کافی تیز ہو گیا ہے۔ ممبئی، اڈیشہ اور کولکاتا سمیت کئی علاقوں میں شدید بارش کے سبب معمولات زندگی درہم برہم ہے۔ ممبئی میں آبی جمائو اور ٹریفک جام کی حالت بنی ہوئی ہے، جبکہ اڈیشہ و جنوبی بنگال میں کئی اضلاع میں شدید ترین بارش کا الرٹ جاری کیا گیا ہے۔ محکمہ موسمیات نے سمندری ساحلی علاقوں میں لوگوں کو الرٹ رہنے کا مشورہ دیا ہے۔ممبئی اور قرب و جوار کے ضلعوں میں گزشتہ 24 گھنٹوں سے لگاتار ہو رہی بارش کے سبب کئی علاقوں میں پانی جمع ہوگیا ہے۔ سیلاب جیسے حالات کو دیکھتے ہوئے مقامی انتظامیہ نے شہریوں کو بے حد ضروری ہونے پر ہی گھر سے باہر نکلنے کا مشورہ دیا ہے۔ لوگوں سے گاڑی بھی انتہائی احتیاط کے ساتھ چلانے کی گزارش کی گئی ہے۔ میونسپل کارپوریشن اور ایمرجنسی خدمات الرٹ پر ہیں۔ کسی بھی آفت والی حالت میں شہری 100، 112 یا 103 نمبرات پر رابطہ کر سکتے ہیں۔ محکمہ موسمیات (آئی ایم ڈی) کے مطابق خلیج بنگال میں بنے ذیلی دبائو کے ڈپریشن میں بدلنے سے اڈیشہ میں 25 سے 28 جولائی تک شدید یا شدید ترین بارش ہو سکتی ہے۔ خصوصاً میوربھنج اور کیونجھر ضلعوں میں 25 جولائی کو 21 سنٹی میٹر سے زیادہ بارش ہو سکتی ہے، جس کے لیے ریڈ الرٹ جاری کیا گیا ہے۔
