عظمیٰ نیوز سروس
سرینگر// لیفٹیننٹ گورنر منوج سنہا نے گرینیڈ حملے پر ڈی جی پی، نلین پربھات اور سیکورٹی ایجنسیوں کے اعلی حکام سے بات کی۔ انہوں نے سیکورٹی حکام کو ملی ٹینٹوں اور ان کے ساتھیوں کو سزا دینے کے لیے موثر اور بھرپور جواب دینے کی ہدایت کی۔ لیفٹیننٹ گورنر نے ملی ٹینٹ عناصر کو ان کے مذموم عزائم میں کامیاب نہیں ہونے دینے کے حکومت کے عزم کا اعادہ کیا۔لیفٹیننٹ گورنر نے سینئر سکیورٹی حکام سے کہا”ہمارے شہریوں کو نشانہ بنانے والے ملی ٹینٹوں کو بہت بھاری قیمت چکانی پڑے گی، آپ کوملی ٹینٹ تنظیموں کو کچلنے کی مکمل آزادی ہے اور اس مشن کو مکمل کرنے کے لیے کوئی کسر نہیں چھوڑیں گے‘‘۔لیفٹیننٹ گورنر نے زخمیوں کی جلد صحت یابی کی خواہش کی اور ہدایت کی کہ ضلعی انتظامیہ ہر ممکن مدد فراہم کرے۔
