گھر میں گھس کر مارا،سرحد پار ایسی کوئی جگہ نہیں ، جہاں ملی ٹینٹ سکون کا سانس لے سکیں:مودی
یو این آئی
نئی دہلی// وزیر اعظم نریندر مودی نے پاکستان کو سخت انتباہ دیتے ہوئے کہا کہ ہندوستان امن چاہتا ہے لیکن اگر وہ کسی دہشت گردی یا فوجی حماقت میں ملوث ہوتا ہے تو ہندوستان اس کا صفایا کرنے میں کوئی کسر نہیں چھوڑے گا۔ آپریشن سندورکے بعد سرحدوں پر فوجی کارروائی روکنے پر اتفاق رائے کے درمیان، وزیر اعظم نریندر مودی منگل کی صبح آدم پور ایئر فورس سٹیشن پہنچے اور وہاں موجود فضائی اور دیگر فوجیوں سے بات چیت کی۔ پاکستان نے لڑاکا طیاروں اور ڈرونز کا استعمال کرتے ہوئے اس ایئر فورس سٹیشن پر ناکام حملے کی کوشش کی تھی۔ مودی نے ہندوستان کے فضائی دفاعی نظام ایس 400 کے سامنے فوجیوں سے خطاب کرتے ہوئے پاکستان کے اس جھوٹ کو بے نقاب کیا جس میں اس نے اس نظام کو تباہ کرنے کا دعویٰ کیا تھا۔ انہوں نے کہا کہ یہ نیا ہندوستان ہے ، یہ ہندوستان امن چاہتا ہے لیکن اگر انسانیت پر حملہ ہوتا ہے تو یہ ہندوستان محاذ جنگ پر دشمن کو تباہ کرنا بھی جانتا ہے ۔ انہوں نے کہا کہ آپریشن سندور کوئی عام فوجی آپریشن نہیں تھا، یہ ہندوستان کی پالیسی، ارادوں اور فیصلہ کن صلاحیتوں کا سنگم تھا۔وزیر اعظم نے کہا کہ دہشت گردی کے خلاف ہندوستان کی لکشمن ریکھا بہت واضح ہے ۔ اگر اب کوئی دہشت گرد حملہ ہوا تو ہندستان اس کا بھرپور جواب دے گا۔
انہوں نے کہا کہ ائراسٹرائک کے وقت تمام نے دیکھا اور آپریشن سندور اب ہندستان کا نیا معمول ہے ، ہم نے تین اصول طے کیے ہیں، اگر ہندستان پر کوئی دہشت گرد حملہ ہوا تو ہم اپنے طریقے سے اور اپنی شرائط پر اور اپنے وقت پر جواب دیں گے ، دوسری بات ہندستان نیوکلیئر بلیک میلنگ کو برداشت نہیں کرے گا، ہندستان دہشت گردی کی سرپرستی کرنے والی حکومت اور دہشت گردی کو الگ الگ نہیں دیکھتا اور اب دنیا بھی ہندستان کی اس نئی شکل کو دیکھتے ہوئے آگے بڑھے گی۔انہوں نے کہا کہ بھارت ماتا کی جئے صرف ایک نعرہ نہیں ہے ، یہ ان سپاہیوں کا درد ہے جو ماں بھارتی کے لیے اپنی جان خطرے میں ڈال دیتے ہیں، یہ ہر اس شہری کی آواز ہے جو ملک کے لیے کچھ کرنا چاہتا ہے ۔ یہ میدان اور مشن میں گونجتا ہے ۔مودی نے کہا کہ آپریشن سندور کوئی عام فوجی آپریشن نہیں تھا۔ انہوں نے کہا کہ جب ہماری بہنوں کا سندور چھین لیا گیا تو ہماری فوج دہشت گردوں کے گھروں میں گھس گئی اور انہیں کچل دیا، جو لوگ بزدلوں کی طرح چھپ کر آئے تھے لیکن وہ بھول گئے کہ جسے انہوں نے للکارا ، وہ ہندوستانی فوج ہے ، آپ نے انہیں سامنے سے حملہ کرکے مار ا ہے ۔’’ انہوں نے کہا کہ سو سے زائد دہشت گردوں کی ہلاکت سے دہشت گردی کے آقا سمجھ گئے ہیں کہ ہندستان کی طرف آنکھ اٹھانے سے تباہی آئے گی۔فضائیہ کی تعریف کرتے ہوئے انہوں نے کہا کہ جب بھی ہندوستان کی اس بہادری کی بات ہوگی، جب بھی ہندوستان کی تاریخ کی بات ہوگی، آپ کے باب پر بھی بات ہوگی۔ انہوں نے کہا کہ ہیروز کی اس سرزمین سے وہ ایئر فورس، نیوی، آرمی اور بی ایس ایف کے ہیروز کو سلام کرتا ہوں۔انہوں نے پاکستان اور ملی ٹینوں کو سخت پیغام دیا گیا کہ اگر بے گناہ لوگوں کی موت ہوتی ہے تو تباہی اور بڑے پیمانے پر تباہی ہو گی۔ انہوں نے کہا کہ جس پاکستانی فوج کے بھروسے ملی ٹینٹ بیٹھے تھے ہندستانی افواج نے اس پاکستانی فوج کو شکست دی ہے ۔ ہماری افواج نے پاکستانی فوج کو بھی بتا دیا ہے کہ پاکستان میں کوئی ایسی ٹھکانہ نہیں جہاں ملی ٹینٹ سکون کی سانس لے سکیں۔ ‘‘ہم گھر میں گھس کر انہیں ماریں گے اور انہیں بدلہ لینے کا موقع بھی نہیں دیں گے ۔’’ انہوں نے کہا کہ پاکستان اپنے ڈرونز اور میزائلوں کے بارے میں سوچ کر کئی دن سو نہیں پائے گا۔ انہوں نے مسلح افواج کی بہادری اور عزم کا تذکرہ کرتے ہوئے کہا کہ آپ نے سرحدوں کی حفاظت کی ہے اور عزت نفس کو نئی بلندیاں دی ہیں، آپ نے ایک بے مثال اور ناقابل تصور حیرت انگیز کام کیا ہے ۔وزیراعظم نے فضائیہ کے جوانوں سے کہا کہ آپ کے اس اقدام سے نہ صرف پاکستان کے ائیر بیس کو شکست ہوئی بلکہ اس کے ناپاک عزائم اور حماقت کو بھی شکست ہوئی ہے ۔ انہوں نے کہا کہ آپریشن سندور کا ہر لمحہ ہندستانی افواج کی طاقت کا منہ بولتا ثبوت ہے ۔ انہوں نے کہا، “بحریہ نے سمندر پر اپنا تسلط برقرار رکھا، سرحد پر فوج مضبوط رہی، فضائیہ نے حملہ کرنے کے ساتھ ساتھ دفاع بھی کیا، جب کہ بی ایس ایف بھی محاذ پر مضبوطی سے کھڑی رہی” ۔
