ملہار کٹھوعہ میںمشتبہ نقل و حرکت کے بعد تلاشی آپریشن جاری | وائٹ نائٹ کور سربراہ کا خطہ چناب میںانسداد ملی ٹینسی آپریشنز کا جائزہ

جموں //سیکورٹی فورسز نے کٹھوعہ ضلع کے ملہار علاقے میں دو مشتبہ مسلح ملی ٹنٹوں کے ڈریگل گاؤں میں دیکھے جانے کے بعد بڑے پیمانے پر ملی ٹنٹ مخالف آپریشن شروع کیا۔ادھر وائٹ نائٹ کور کے جنرل آفیسر کمانڈنگ نے ادھم پور، ڈوڈا اور کشتواڑ اضلاع کے پہاڑی علاقوں میں دہشت گردوں کے ساتھ حالیہ تصادم کے بعد جاری انسداد دہشت گردی آپریشن کا جائزہ لیا۔ جموں کے کٹھوعہ ضلع کے دور افتاد علاقوں میں دو مشتبہ ملی ٹنٹوں کی نقل و حرکت کی اطلاعات ملنے کے بعد سیکورٹی فورسز نے بڑے پیمانے پر تلاشی آپریشن شروع کردیا ہے ۔ عہدیداروں نے بتایا کہ جموں و کشمیر پولیس، فوج اور سینٹرل ریزرو پولیس فورس مشترکہ طور پر تلاشی مہم چلا رہے ہیں۔ علاقے کو گھیرے میں لے لیا گیا ہے اور مشتبہ عسکریت پسندوں کی تلاش کے لیے وسیع پیمانے پر تلاشی جاری ہے۔ایک سینئر پولیس افسر نے بتایا’’آپریشن دو مسلح ملی ٹینٹوں کی نقل و حرکت کے بارے میں مصدقہ اطلاعات کے بعد شروع کیا گیا تھا‘‘۔ انہوں نے کہا کہ علاقے کے مقامی لوگوں نے صبح سے ہی سیکورٹی اہلکاروں کی نقل و حرکت میں اضافے کی اطلاع دی، جب کہ گھنے جنگلاتی پٹیوں اور ملہار کے اونچے علاقوں میں فورسز کی آمدورفت بڑھ رہی ہے۔ حکام نے تصدیق کی کہ دریگام کے آس پاس کے متعدد بستیوں میں وقفے وقفے سے تلاشی لی جا رہی ہے، مشتبہ افراد کو فرار ہونے سے روکنے کے لیے تمام خارجی راستوں کو سیل کر دیا گیا ہے۔ تاہم ابھی تک مشتبہ ملی ٹنٹوں سے کوئی رابطہ قائم نہیں ہوا ہے۔اسی دوران وائٹ نائٹ کور کے جنرل آفیسر کمانڈنگ لیفٹنٹ جنرل پی کے مشرا نے ادھم پور، ڈوڈہ اور کشتواڑ اضلاع کے پہاڑی علاقوں میںملی ٹینٹوں کے ساتھ حالیہ تصادم کے بعد جاری انسدادملی ٹینسی آپریشن کا جائزہ لیا۔حکام نے بتایا کہ ملی ٹینٹوں کے ساتھ گولی باری میں ایک فوجی کی ہلاکت کے بعد جمعہ کی شام سے ادھم پور ضلع کے ڈوڈہ بسنت گڑھ کو ڈوڈہ ضلع کے بھدرواہ سے جوڑنے والے سیوج دھر جنگل میں بڑے پیمانے پر تلاشی مہم جاری ہے۔ عہدیداروں نے بتایا کہ جی او سی، انسداد بغاوت فورس (ڈیلٹا) میجر جنرل اے پی ایس بال کے ساتھ، کور کمانڈر کارروائیوں کا جائزہ لینے کے لیے ایک ہیلی کاپٹر میں سیوج دھر گئے۔انہوں نے کہا کہ اگرچہ سیوج دھر اور کیشوان جنگلات میں ابتدائی گولیوں کی لڑائی کے بعد ملی ٹینٹوں سے کوئی رابطہ نہیں ہوا تھا، لیکن گھنے جنگلات پر ہیلی کاپٹروں کو منڈلاتے ہوئے دیکھا گیا تھا جو کومبنگ آپریشن کرتے ہوئے زمین پر فوج، پولیس اور سی آر پی ایف کی مشترکہ پارٹیوں کے ساتھ محصور تھے۔