نئی دہلی// ملک میں کورونا انفیکشن کی رفتاردھیمی پڑنے سے نئے کیسوں میں کمی اور صحت یاب ہونے والوں کی تعداد میں مسلسل بہتری کی وجہ سے ایکٹو کیسز میں مسلسل کمی واقع ہورہی ہے اور ان کی تعداد اب کم ہوکر ساڑھے تین لاکھ ہوگئی ہے۔
مرکزی وزارت برائے صحت اور خاندانی بہبود کی جانب سے جاری اعداد و شمار کے مطابق گذشتہ 24 گھنٹوں کے دوران22065 نئے کیسز سامنے آئے جس سے انفیکشن کے مجموعی کیسز 99.06 لاکھ ہو گئے ہیں۔ اس دوران34477 مریضوں کے صحت یاب ہونے سے صحت یاب ہونے والوں کی تعداد 94.22 لاکھ اور شفایابی کی شرح 95.12 فیصد ہوگئی ہے۔ ایکٹو کیسزکی شرح کم ہوکر 3.43 فیصد رہ گئی ہے۔ اسی دوران 354 مریضوں کی موت ہونے سے جاں بحق ہو نے والوں کی تعداد 1 لاکھ 43 ہزار 709 ہوگئی ہے اور شرح اموات بھی 1.45 فیصد ہے۔
