نئی دہلی// وزارت صحت کی جانب سے بدھ کوجاری تازہ ترین اعداد و شمار میں کہا گیا ہے ملک میں کورونا وائرس کے کیسز کم نہیں ہورہے ہیں۔
گزشتہ24 گھنٹوں کے دوران ملک میں کورونا وائرس کے78357 نئے کیسز رپورٹ ہوئے جس سے متاثرین کی مجموعی تعداد 3769524 پہنچ گئی ہے۔ گزشتہ 24 گھنٹوں کے دوران جان لیوا وائرس سے 1045 متاثرہ افراد کی موت ہوگئی جس سے ہلاک شدگان کی مجموعی 66333 ہوگئی۔
اب تک2901909 مریض مہلک وبا سے شفایاب ہوچکے ہیں۔ اس سے پہلے گزشتہ 24 گھنٹوں میں 62026 مریض صحت یاب ہوئے۔ ملک میں کوروناسے شفایابی کی شرح 76.98 فیصد اوراموات کی شرح 1.76 فیصد ہے۔
فی الحال ملک میں کورونا کے فعال کیسز 21.26 فیصد یعنی آٹھ لاکھ ایک ہزار 282 ہیں۔
ملک میں عالمی وباکووڈ۔ 19 کے یومیہ بڑھتے قہر کو روکنے کے لئے اس کی جانچ ، علاج اور رابطے کی تلاش پر مستقل زور دیا جارہا ہے اور اسی مہم کے تحت یکم ستمبر کو ایک دن میں پھر 10 لاکھ سے زائد نمونوں کی جانچ کی گئی۔
منگل کو 10 لاکھ 12 ہزار 367 نمونوں کی جانچ کی گئی۔
گزشتہ پندرہ دن کے اندر یہ تیسرا موقع ہے جب ایک دن میں کورونا وائرس کے 10 لاکھ سے زیادہ نمونوں کی جانچ کی گئی۔
29 اگست کو ملک میں ریکارڈ 10 لاکھ 55 ہزار 27 نمونوں کے ٹسٹ کئے گئے۔ اس سے قبل 21 اگست کو 10 لاکھ 23 ہزار 836 کورونا ٹسٹ ہوئے تھے اور ہندوستان ایک دن میں 10 لاکھ سے زیادہ کورونا وائرس کا ٹسٹ کرنے والا دنیا کا تیسرا ملک بن گیا تھا۔
میڈیکل ریسرچ کونسل آف انڈیا (آئی سی ایم آر) کے مطابق یکم ستمبر تک ملک بھر میں کورونا وائرس کے کل 4 کروڑ 43 لاکھ 37 ہزار 201 نمونوں کی جانچ کی جاچکی ہے۔
