یواین آئی
ملبورن/کپتان پیٹ کمنز اور سکاٹ بولینڈ (تین وکٹ) کی شاندار گیند بازی کی بدولت آسٹریلیا نے چوتھے ٹیسٹ میچ کے آخری دن پیر کو ہندوستان کو 184 رن سے شکست دے کر پانچ میچوں کی سیریز میں 2-1 کی ناقابل شکست برتری حاصل کر لی۔ چائے کے وقت ہندوستان تین وکٹوں پر 112 رن پر اچھی پوزیشن میں تھا۔ یشسوی جیسوال اور رشبھ پنت کی جوڑی بڑے اسکور کی طرف بڑھ رہی تھی تبھی 59ویں اوور میں ٹریوس ہیڈ نے پنت کو مارش کے ہاتھوں کیچ آؤٹ کروا کر ہندوستان کو چوتھا دھچکا دیا۔ پنت نے 30 رن بنائے ۔ اس کے بعد وکٹوں کی جھڑی لگ گئی۔ 63ویں اوور میں رویندر جڈیجہ (دو) بولینڈ نے کیری کے ہاتھوں کیچ کراکر آسٹریلیا کو پانچویں کامیابی دلوائی۔ ساتویں وکٹ کے طور پر یشسوی جیسوال (84) کے آؤٹ ہونے کے بعد میچ مکمل طور پر ہندوستان کے ہاتھ سے نکل گیا۔ ہندوستان کی طرف سے صرف دو بلے باز یشسوی جیسوال (84) اور رشبھ پنت (30) ڈبل فیگر تک پہنچ سکے جبکہ 12 رنز اضافی ملے ۔ کپتان روہت شرما (نو) اور کے ایل راہل (صفر) اور وراٹ کوہلی 5 رن بنانے کے بعد آؤٹ ہوئے ۔ پہلی اننگز میں سنچری بنانے والے نتیش ریڈی دوسری اننگز میں صرف ایک رن بنا سکے ۔ دیگر بلے بازوں میں رویندر جڈیجہ (دو)، آکاش دیپ (سات)، کپتان جسپریت بمراہ (صفر)، محمد سراج (صفر) پر آؤٹ ہوئے جب کہ واشنگٹن سندر (پانچ) رن بنا کر ناٹ آؤٹ رہے ۔ آسٹریلیائی بالنگ اٹیک کے سامنے ہندوستانی ٹیم 79.1 اوور میں 155 رن پر ڈھیر ہوگئی۔ آسٹریلیا نے 12 سال بعد ہندوستان سے باکسنگ ڈے ٹیسٹ جیتا ہے ۔ اس جیت کے ساتھ ہی آسٹریلیا کی ڈبلیو ٹی سی فائنل میں پہنچنے کی امیدیں بڑھ گئیں۔ آسٹریلیا کی جانب سے کپتان پیٹ کمنز، اسکاٹ بولینڈ نے تین تین، نیتھن لیون نے دو، مچل اسٹارک اور ٹریوس ہیڈ نے ایک ایک وکٹ حاصل کیا۔ پہلی اننگز میں 49 رن اور تین وکٹ اور دوسری اننگز میں تین وکٹوں کے ساتھ 41 رن دینے والے پیٹ کمنز کو ‘پلیئر آف دی میچ’ سے نوازا گیا۔ اس سے پہلے صبح کے سیشن میں جسپریت بمراہ نے دوسرے ہی اوور میں ناتھن لیون (41) کو آؤٹ کرکے آسٹریلیا کی دوسری اننگز کا خاتمہ کیا۔ آسٹریلیا کی پوری ٹیم 234 رن پر ڈھیر ہو گئی۔ ہندوستان کی جانب سے جسپریت بمراہ نے پانچ وکٹ حاصل کئے ۔ محمد سراج نے تین وکٹیں جبکہ رویندر جڈیجہ نے ایک بلے باز کو آؤٹ کیا۔ آسٹریلیا نے پہلی اننگز میں 474 رن بنائے تھے ۔ اس کے بعد نتیش کمار ریڈی کی سنچری اننگز کی بدولت ہندوستان نے پہلی اننگز میں 369 رن بنائے اور اس کے بعد آسٹریلیا کی ٹیم دوسری اننگز میں 234 رن پر آل آؤٹ ہوگئی۔
