ایجنسیز
نئی دہلی// وزیر دفاع راج ناتھ سنگھ نے جمعرات کو کہا کہ پاکستان کے زیر قبضہ جموں و کشمیر (پی او جے کے)کے لوگ ہندوستان کے “اپنے خاندان” کا حصہ ہیں اور وہ دن دور نہیں جب وہ اپنی اندرکی آواز سن کر ہندوستان کے مرکزی دھارے میں واپس آئیں گے۔ پاکستان کے تئیں ہندوستان کے پالیسی نقطہ نظر کو بیان کرتے ہوئے سنگھ نے کہا کہ نئی دہلی نے ملی ٹینسی کے خلاف اپنی حکمت عملی اور ردعمل کو “دوبارہ ڈیزائن اور نئے سرے سے وضع کیا ہے” اور اسلام آباد کے ساتھ ممکنہ بات چیت صرف دہشت گردی اور مقبوضہ کشمیرپر ہوگی۔سی آئی آئی بزنس سمٹ میں انہوں نے کہا کہ دفاعی شعبے میں میک ان انڈیا ملک کی قومی سلامتی کا ایک لازمی جزو رہا ہے اور اس نے آپریشن سندور کے دوران دہشت گردی کے خلاف ہندوستان کی موثر کارروائی میں کلیدی کردار ادا کیا۔انہوں نے کہا کہ مجھے یقین ہے کہ پاکستانی مقبوضہ کشمیرکے لوگ ہمارے اپنے ہیں، ہمارے خاندان کا حصہ ہیں۔انہوں نے کہا”ہم ‘ایک بھارت شریشٹھ بھارت’ (ایک ہندوستان، بہترین ہندوستان)کے ریزولیوشن کے لیے پرعزم ہیں اور ہمیں پورا یقین ہے کہ ہمارے وہ بھائی جو آج جغرافیائی اور سیاسی طور پر ہم سے الگ ہو چکے ہیں، وہ بھی ان کی روح کی آواز کو سنتے ہوئے، کسی نہ کسی دن عزت نفس کے ساتھ ہندوستان کے مرکزی دھارے میں واپس آئیں گے” ۔انہوں نے کہا کہ وہاں کے زیادہ تر لوگ بھارت کے ساتھ گہرا تعلق محسوس کرتے ہیں، صرف چند ایک ایسے ہیں جنہیں گمراہ کیا گیا ہے۔وزیر دفاع نے کہا کہ PoJK کا ہندوستان کے ساتھ اتحاد “اس ملک کی ثقافتی، سماجی اور اقتصادی خوشحالی” پر منحصر ہے۔پاکستان کو ایک واضح پیغام میں سنگھ نے یہ بھی کہا کہ دہشت گردی کا کاروبار لاگت سے موثر نہیں ہے اور اس کی بھاری قیمت چکانی پڑے گی جیسا کہ اسلام آباد کو اب احساس ہو گیا ہے۔
