سمت بھارگو
راجوری//گزشتہ نو دنوں سے بند مغل شاہراہ پر اتوار کے روز تازہ برفباری ہوئی، جس سے راستے کی بحالی میں مزید تاخیر کا خدشہ پیدا ہو گیا ہے۔ پہلے یہ توقع کی جا رہی تھی کہ سڑک ایک یا دو دن میں کھل جائے گی۔قابل ذکر بات یہ ہے کہ مغل روڈ گزشتہ ہفتے جمعہ کے روز برفباری کے باعث بند ہو گئی تھی۔ جموں و کشمیر میکینکل انجینئرنگ ڈیپارٹمنٹ نے پیر کے روز برف صاف کرنے کا کام مکمل کر لیا تھا، لیکن راستے کی پھسلن کے باعث سڑک بحال نہ ہو سکی۔حکام کے مطابق پیر سے سڑک کو پھسلن اور حادثات کے خدشے کے پیش نظر بند رکھا گیا ہے۔سب ڈویژنل مجسٹریٹ (ایس ڈی ایم) سرنکوٹ، فاروق خان نے بتایاکہ ’’ہمیں امید تھی کہ آج سڑک کی پھسلن میں کچھ بہتری آئے گی، لیکن علاقے میں تازہ برفباری ہوئی ہے اور برفباری کی شدت مزید بڑھنے کا امکان ہے‘‘۔انہوں نے مزید کہا کہ اتوار کی شام تک چھ سے آٹھ انچ برف پڑ چکی ہے اور آئندہ گھنٹوں میں اس میں مزید اضافہ متوقع ہے۔تازہ برفباری نے نہ صرف راستے کی بحالی میں رکاوٹ پیدا کی ہے بلکہ علاقے میں سفر کرنے والوں کی مشکلات میں بھی اضافہ کیا ہے۔ حکام نے عوام سے اپیل کی ہے کہ وہ اس دوران احتیاط برتیں اور غیر ضروری سفر سے گریز کریں۔مغل روڈ کے ذریعے پیر پنجال کے دونوں اطراف کے لوگوں کو جوڑنے والا یہ راستہ کئی دنوں سے بند ہے، اور اس کی بحالی کے لئے برفباری کے رکنے اور سازگار حالات کا انتظار کیا جا رہا ہے۔
