مغرب کا مخمصہ

نیوزی   لینڈ میں ایک عیسائی دہشت گرد کی جنونیت وحیوانیت نے مغرب کو ایک بار پھر فکر وفلسفے کے اعتبار سے تاریخ کے دوراہے پر لاکھڑا کر دیا ہے۔ ظلم کی اس کہانی میں مغرب کا مخمصہ یہ ہے کہ جنونیت کا چلتا پھر تا اشتہار ٹیرنٹ ہیرو ہے یا اُسے روکنے کی کوشش میں کئی جانیں بچا کر نقد ِجاں ہارنے والا پاکستان کا بہادر بیٹا نعیم رشید؟ اس واردات میں مغرب کا مخمصہ امریکی صدر ڈونلڈ ٹرمپ کی ٹویٹر اٹکھیلیوں سے عیاں ہوتا ہے۔ وہ پہلے نہ تو اس قتل عام پر کھلے بندوں اظہار نفرت کر سکے نہ قاتل کی مذمت میں دوبول کہہ سکے۔ اسی لیے اپنی مخمصوں بھری ٹویٹ انہیں بعد میں ڈیلیٹ کرنا پڑی۔ یہ تنہا ٹرمپ کا مخمصہ نہیں بلکہ مغرب کی وسیع وعریض دنیا آج بھی اُسی مخمصے کی دلدل میں پھنس کر رہ گئی ہے جو مسلمانوں کے عروج تو درکنار معمولی سے استحکام میں اپنا زوال اور ذلت تلاشتی ہے۔ فی ا الاصل آج بھی صدیاں گزرنے کے بعد مغرب صلیبی دنیا کے عروج کی یادوں میں گم اور اس عروج کے چھن جانے کے خوف میں مبتلا ہے۔ ٹرمپ کے برعکس نیوزی لینڈ کی ۳۸سالہ وزیر اعظم جسینڈا آرڈرن، برطانوی وزیر اعظم تھریسامے سمیت بہت سے مغربی حکمران ایک واضح لائن لئے نظر آئے۔ یہ مغرب میں دو سوچوں کی موجودگی کا پتہ دیتا ہے۔ یہ سوچ ابھی مضبوط ہے کہ مسلمان مغرب کے اچھے اور کارمد شہری ہیں انہیں اس معاشرے میں آنے اور ضم ہونے کے مواقع ملتے رہنا چاہیے۔ دوسری سوچ صلیبی جنگوں میں پھنسی ہوئی ہے۔ جس کے خیال میں مسلمانوں کا وجود اس کرۂ ارض سے مٹا ڈالنا چاہیے۔ بوسنیا اور کوسوو کے بحرانوں میں انہی دو سوچوں کے درمیان لڑائی چلتی رہی مگر دیر ہی سے سہی صلح جویانہ سوچ غالب آگئی۔

ٹرمپ دل پر جبر کرکے واقعے کی مذمت تو کر چکے ہیں مگر ان کا ٹویٹر فرمان تھا : ’’نیوزی لینڈ واقعے کے باوجود وہ نہیں سمجھتے کہ سفید قوم پرستی اُبھرتا ہوا عالمی خطرہ ہے ،یہ ایک چھوٹا سا گروہ ہے جسے سنجیدہ مسائل کا سامنا ہے‘‘۔ اس جملے کے تحت الشعور میں یہ بات موجود ہے کہ سفید فام قوم پرستی ایک عالمی لہر بننے کی صلاحیت رکھتی ہے۔ امریکہ کے کسی صدر نے کبھی بھولے سے فلسطینیوں کے مسائل میں خوردبین ہی سے سنجیدگی تلاش کی ہوتی اور پھر اس کا اعتراف کیا ہوتا۔مسائل مشرق سے مغرب تک کہاں موجود نہیں مگر امریکی صدر کی ہمدردی سفید فام نسل پرستوں سے یوں چھلک پڑی ہے کہ ایک زمانہ حیران ہے۔ نیوزی لینڈ میں کرائسٹ چرچ کی دو مساجد پر فائرنگ میں نماز جمعہ کے ادائیگی کرتے ہوئے پچاس مسلمان شہید ہو گئے۔ نیوزی لینڈ کی خاتون وزیر اعظم نے اپنے ابتدائی ردعمل میں اسے دہشت گردی کا واقعہ قراردیا۔ پاکستانی وزیر اعظم نے اس واقعے کو اسلامو فوبیا کا شاخسانہ قرار دیا اور کہا کہ اس سے ثابت ہوتا ہے کہ دہشت گردی کا کسی مذہب سے کوئی تعلق نہیں ہوتا۔ حقیقت یہ ہے کہ نائن الیون کے بعد جس طرح دنیا میں اسلامو فوبیا کا بیج بویا گیا، نیوزی لینڈ کا واقعہ اسی کا برگ وبار ہے۔

اسلام کی ترقی ومقبولیت اور پھیلاؤ اس سے پہلے بھی بہت سوں کو کھٹک رہا تھا مگر نائن الیون کے بعد تو وہ مائنڈ سیٹ اسلام اور مسلمانوں کے خلاف تلواریں سونت کر میدان میں نکل آیا۔ امریکی صدر جارج بش نے نائن الیون کے واقعے پر کہا تھا کہ دشمن نے ہم پر کروسیڈز مسلط کر دی ہیں گویا کہ ایک اور صلیبی جنگ چھیڑ دی ہے۔ صلیبی جنگ مسلمانوں اور عیسائی حکمرانوں کے درمیان طویل اور تاریخی رزم آرائیوں کا نام ہے ،جس میں کبھی مسلمان فاتح رہے، کبھی عیسائی جیت گئے۔ جارج بش کے اس ایک جملے پر مبنی تشبیہ نے ساری حقیقت عیاں کر کے رکھ دی تھی۔ نائن الیون کے بعد مغربی ذرائع ابلاغ نے زہر آلود ٹاک شوز سجائے، مضامین اور کالم شائع کئے ، کارٹون بنائے، کتابیں شائع ہوئیں اور ان سب میں مسلمانوں کو فساد فی الارض کا باعث طبقہ بنا کر پیش کیا گیا۔ اسلام اور مسلمانوں کو ہر زاؤیے سے دہشت گردی کے ساتھ بریکٹ کیا گیا۔ جب بھی مغرب میں کوئی واردات ہوئی تو میڈیا نے اسلامک ٹرئیرازم کا ڈھول جم کر پیٹا۔ جب بھی کسی سفید فام یا غیر مسلم نے کوئی واردات کی تو اس کے لیے مجرم اور قاتل کی اصطلاح استعمال کی گئی۔ ایسا کرتے ہوئے مجرم کے مذہب کا ذکر صفائی سے گول کیا جاتا رہا۔ مسلمان کی دہشت گردی میں مذہب کے عنصر کو اُبھارا جاتا تو عیسائی یا یہودی کی دہشت گردی کی صورت میں مذہب کا ذکر غائب ہوجاتا۔ یہ ایک دل خراش تضاد اور سوچی سمجھی پالیسی تھی جس کا مقصد مسلمانوں کو مجموعی طور پر اور ان کی تہذیب کو کلیتاً دفاعی پوزیشن اور ایک کٹہرے میں کھڑا کیے رکھنا اور مسلمانوں کو خوف، نفرت اور دہشت کی علامت بنا کر پیش کر نا تھا۔ کسی مسلمان کے انفرادی فعل کا اس کے مذہب کے ساتھ دور کا تعلق بھی نہیں ہوتا ۔ کہیں سماجی حالات کا عمل دخل ہوتا تو کہیں ردعمل کی کوئی اور وجہ پس پردہ موجود ہوتی مگر ایسے ہر واقعے کے مرتکب شخص کی مذہبی شناخت کو سب سے اوپر رکھا جاتا جیسے کہ یہ کسی فرد کے بجائے پوری تہذیب اور مذہب کا فعل ہو۔

مغرب کی سوچی سمجھی اسکیم کے باوجود مغربی معاشروں میں اسلام تیزی سے پھیلتا چلا گیا۔ اسلام کے فروغ اور اشاعت کو روکنا تو ممکن نہ ہوا مگر اس سے اسلام دشمن مائنڈ سیٹ( جسے اسلاموفوبیا کہا جاتا ہے) کو تقویت ملتی چلی گئی۔ اب نیوزی لینڈ میں معصوم نمازیوں کو شہارت کی خونین قبائیں پہنا کر کے اس حیوانی ذہنیت نے اپنا وجود دکھلا دیا ہے۔ حیرت کا مقام ہے کہ برسوں سے اسلامک ٹر یئررسٹ کی جگالی کرنے والے مغربی میڈیا نے اس واقعے میں ’’کرسچین ٹیررسٹ‘‘ کی اصطلاح ایک بار بھی استعمال نہیں کی۔ یہی تضادات اور د وہرے میعارات دنیا میں خرابی کی جڑ ہیں۔ نیوزی لینڈ کا قاتل کوئی پاگل شخص نہیں تھا، وہ فکری اعتبار سے ایک مکمل نظریاتی انسان نظر آتا ہے۔ ایک سفید فام عیسائی کے طور پر اس کا نظریاتی شعور اور کٹر پنتھ بھی بہت مضبوط ہے۔ اس نے اپنا پورا دماغ اور فکر بندوق پر کھول کر رکھ دئے تھے۔ وہ اپنے ہدف میں یکسو ہے اور اپنی سوچ اورفکر کے تائید کنندہ گان کے لیے بہادری اور چاہا جانے والا کردار بننے کی صلاحیت رکھتا ہے۔ مغرب نے تھوڑی سے غفلت برتی تو ٹیرنٹ سفید فام دنیا کا ہیرو بن کر اُبھر سکتا ہے اور جو خطرہ ٹرمپ کو ابھی دکھائی نہیں دے رہا حقیقت بن کر سرچڑھ کر بولتا نظر آئے گا۔ کچے ذہنوں کے لیے ایسے قابل نفرین کرداروں کو رومنٹسائز کرنے کو بہت کچھ ہوتا ہے۔ یہ لہر چل پڑی تو مسلمان دنیا میں عراق، افغانستان اور شام سجانے والوں کو گھروں میں ایسے مناظر دیکھنا پڑیں گے۔ مغرب کے لیے بہتر یہی ہے کہ وہ جلد مخمصے کو جھٹک کر نیوزی لینڈ کی مسجد میں قاتل دہشت گرد کا بندوق روک کر کئی بچانے والے شہیدنعیم رشید کو ہیرو کے طور پر قبول کرے، بصورت دیگر ٹیرنٹ خود بخود ہیرو بنتا چلا جائے گا۔ یوں علامہ اقبال کی پیش گوئی سچ ثابت ہو سکتی ہے   ع

تمہاری تہذیب اپنے خنجر سے آپ ہی خودکشی کرے گی

 گویا جس تہذیب وریاست کو اُسامہ بن لادن برباد نہ کرسکا ،اُسے مغرب کے اپنے ہی متعصب و جاہل فرزند برینٹن ٹیرنٹ لے ڈبونے کا باعث بن سکتا ہے۔

�����