یو این آئی
نئی دہلی//مرکزی وزیر داخلہ امت شاہ آج پونے مہاراشٹرا میں مغربی زونل کونسل کی 27ویں میٹنگ کی صدارت کریں گے۔مغربی زونل کونسل ریاستوں گوا، گجرات، مہاراشٹر اور مرکز کے زیر انتظام علاقے دادرا اور نگر حویلی اور دمن اور دیو پر مشتمل ہے۔ اس میٹنگ کی میزبانی مہاراشٹر کی حکومت کرے گی اور اس کا اہتمام بین ریاستی کونسل سکریٹریٹ کے تعاون سے کیا جا رہا ہے۔مغربی زونل کونسل کی 27ویں میٹنگ میں رکن ریاستوں کے وزرائے اعلی اور مرکز کے زیر انتظام علاقے کے ایڈمنسٹریٹر کے ساتھ ساتھ ہر ریاست کے دو سینئر وزرا شرکت کریں گے۔ چیف سکریٹریز، مشیر، ریاستی حکومتوں اور مرکز کے زیر انتظام علاقوں کے سینئر عہدیدار، مرکزی داخلہ سکریٹری، سکریٹری بین ریاستی کونسل اور مرکزی حکومت کے دیگر سینئر عہدیدار بھی میٹنگ میں شرکت کریں گے۔ریاستوں کی تنظیم نو ایکٹ 1956 کے سیکشن 15-22 کے تحت 1957 میں پانچ زونل کونسلیں قائم کی گئیں۔ مرکزی وزیر داخلہ ان پانچ زونل کونسلوں کے چیئرمین ہیں، جبکہ متعلقہ زونل کونسل میں شامل ریاستوں کے وزرائے اعلی اور مرکز کے زیر انتظام علاقے کے منتظم یا گورنر اس کے رکن ہیں۔ علاقائی کونسل میں شامل ریاستوں کے وزرائے اعلی ہر سال باری باری اس کے نائب صدر ہوتے ہیں۔ ہر ریاست سے دو مزید وزرا کو گورنر کونسل کے ممبر کے طور پر نامزد کرتا ہے۔ ہر زونل کونسل نے چیف سیکریٹریز کی سطح پر ایک اسٹینڈنگ کمیٹی بھی تشکیل دی ہے۔مضبوط ریاستیں ایک مضبوط قوم بنائیں کے جذبے میں، زونل کونسلیں دو یا دو سے زیادہ ریاستوں یا مرکز اور ریاستوں کو متاثر کرنے والے مسائل پر باقاعدہ بات چیت اور مذاکرات کے لیے ایک منظم طریقہ کار کے ذریعے تعاون کو بڑھانے کے لیے ایک پلیٹ فارم مہیا کرتی ہیں۔علاقائی کونسلیں مرکز اور ریاستوں اور خطے میں ایک یا زیادہ ریاستوں سے متعلق مسائل اٹھاتی ہیں۔ اس طرح، زونل کونسلیں مرکز اور ریاستوں کے درمیان اور خطے میں کئی ریاستوں کے درمیان تنازعات اور مسائل کو حل کرنے کے لیے ایک بہترین فورم فراہم کرتی ہیں۔زونل کونسلز کے ہر اجلاس میں قومی اہمیت کے بعض امور پر بھی تبادلہ خیال کیا جاتا ہے۔
