کولکتہ//مغربی بنگال کے شمالی 24پرگنا ضلع کے گائے گھاٹا علاقے میں منگل کی دوپہر اچانک آئے شدید طوفان نے بڑے پیمانے پر تباہی مچائی۔ تیز آندھی اور اولوں کے ساتھ آئے طوفان نے تقریباً 35کچے مکانات کو زمین بوس کر دیا، جس کے نتیجے میں متعدد افراد زخمی ہو گئے۔ کھڑی فصلوں کو بھی شدید نقصان پہنچا، جس سے کسانوں کی مشکلات میں مزید اضافہ ہو گیا۔مقامی لوگوں کے مطابق طوفان اتنی تیزی سے آیا کہ سنبھلنے کا موقع ہی نہیں ملا۔ صرف چند منٹوں میں کئی گھروں کی چھتیں اڑ گئیں، دیواریں گر گئیں اور کھیتوں میں کھڑی فصلیں تباہ ہو گئیں۔ طوفان کے بعد سے علاقے میں خوف و ہراس کا ماحول ہے، اور متاثرہ افراد کھلے آسمان کے نیچے زندگی گزارنے پر مجبور ہیں۔متاثرین میں شامل شیفالی نامی خاتون نے بتایا کہ طوفان نے ان کا سب کچھ اجاڑ دیا۔ ان کے گھر کی چھت اڑ گئی اور کھیت پوری طرح برباد ہو گئے۔ ان کے کچھ مویشی بھی طوفان کی زد میں آ کر ہلاک ہو گئے۔ ایک اور مقامی باشندے گوپال سین کے مطابق ان کے گھر کی ٹین کی چھت اڑ گئی اور کافی نقصان ہوا۔پریتم منڈل نامی ایک اور دیہاتی نے بتایا کہ منگل کی شام تقریبا 3:15 بجے اچانک آئے طوفان نے پورے گاں کو ہلا کر رکھ دیا۔ طوفان چند ہی منٹ جاری رہا، مگر اس نے سب کچھ تباہ کر دیا۔ کسانوں کو سب سے زیادہ نقصان ہوا ہے کیونکہ ان کی فصلیں مکمل طور پر برباد ہو چکی ہیں، اور اب ان کے پاس کھانے کے بھی لالے پڑ گئے ہیں۔مقامی افراد کا کہنا ہے کہ انہیں ابھی تک کسی قسم کی سرکاری مدد نہیں ملی ہے۔ وہ اپنے گھروں کے برباد ہونے کے بعد بے یار و مددگار ہو چکے ہیں اور حکام سے فوری امداد کی اپیل کر رہے ہیں۔ لوگوں کا مطالبہ ہے کہ انہیں فوری طور پر راشن، عارضی رہائش اور مالی مدد فراہم کی جائے تاکہ وہ دوبارہ اپنی زندگی کو سنوار سکیں۔
مغربی بنگال میں طوفان کے سبب تباہی درجنوں مکانات منہدم، متعدد زخمی، فصلوں کو شدید نقصان
