یو این آئی
نئی دہلی// وزیر اعظم نریندر مودی نے ہفتہ کو کہا کہ ملک کی معیشت نے گزشتہ دہائی میں 90 فیصد کی ترقی کی ہے ، جب کہ اس کے مقابلے میں دنیا کی معیشت میں صرف 35 فیصد اضافہ ہوا ہے ۔ مودی نے یہاں ای ٹی ورلڈ لیڈرز فورم میں ہندوستان کی اقتصادی ترقی، غربت کے خاتمے اور بنیادی ڈھانچے کی ترقی کو اجاگر کرنے کے ساتھ ساتھ پچھلی دہائی میں ہندوستان کی ترقی اور لوگوں کی زندگیوں میں مثبت تبدیلیوں کے بارے میں بتایا۔ وزیراعظم نے کہا کہ گزشتہ 10 برسوں میں 25 کروڑ لوگ غربت سے باہر آئے ہیں۔
انہوں نے کہا کہ ہندوستان کی معیشت نے پچھلے 10 برسوں میں 90 فیصد سے زیادہ ترقی کی ہے ، جو اس پائیدار ترقی کا نتیجہ ہے جس کا وعدہ کیا گیا تھا۔ انہوں نے یقین دلایا کہ ترقی کی یہ رفتار مستقبل میں بھی جاری رہے گی۔ وزیر اعظم نے کہا کہ گزشتہ دہائی میں ملک کی کامیابیوں کو دیکھتے ہوئے ہندوستانیوں کے خود اعتمادی میں اضافہ ہوا ہے مودی نے کہا کہ ہندوستان کی کامیابیاں اب عالمی سرخیاں بن گئی ہیں۔ جہاں ایک طرف غریبوں کی اپنی خواہشات تھیں وہیں دوسری طرف انہیں بینک کھاتوں تک رسائی اور بنیادی سہولیات جیسے چیلنجز کا بھی سامنا تھا۔ حکومت کے عزم کو اجاگر کرتے ہوئے ، انہوں نے کہا، “ہم نے غریبوں کو بااختیار بنانے کے راستے کا انتخاب کیا اور اس سے کافی تبدیلی آئی ہے ۔”مسٹر مودی نے کہا کہ 100 سے بھی کم دنوں میں حکومت نے غریبوں، خواتین، نوجوانوں اور کسانوں کو فائدہ پہنچانے والی اہم اصلاحات نافذ کی ہیں۔ ان اصلاحات میں زیادہ پیداوار دینے والے بیج متعارف کرانا اور 11 لاکھ نئی ‘لکھ پتی دیدیاں’ بنانا شامل ہیں۔
