سرینگر// شب ِ معراج العالمؐکی تقریبات عقیدت واحترام سے منائی گئیں۔ اس سلسلے میں پوری وادی کی مساجد ، خانقاہوں میں رات بھر شب خوانی ہوئی اور درود ازکار کی محفلیں بھی آراستہ ہوئیں۔سب سے بڑی تقریب درگاہ حضرتبل میں منعقد ہوئی ،جہاں شہر سرینگر سمیت وادی کے اطراف واکناف سے سینکڑوں کی تعداد میں لوگ جمع ہوئے اور وہ رات بھر شب خوانی میں محو رہے۔ کپوارہ، ،بارہمولہ، سوپور ، بانڈی پورہ ، پلوامہ ، شوپیان ، گاندربل ، اسلام آباد ،بڈگام سمیت دیگر اضلاع کے دور دراز دیہات سے مرد وزن کی ایک بڑی تعدا د درگاہ حضرت بل پہنچی ۔ شبِ معراج العام ؐ کے سلسلے میں انتظامیہ نے زائرین کو درگاہ شریف حضرت بل اور دیگر مقدس مقامات تک لانے اور لیجانے کیلئے ٹرانسپورٹ کے علاوہ پانی اور بجلی کے مناسب انتظامات کئے تھے جبکہ کئی رضاکار تنظیموں نے زائرین کی سہولیات کیلئے خصوصی کیمپ لگا دئے تھے۔انتظامیہ نے چند دن قبل ہی درگاہ شریف حضرت بل جانے والی سڑکوں پر چراغاں کیا گیا تھا اور درگاہ شریف حضرت بل کو بجلی قمقموں سے سجایا گیا جو دلفریب مناظر پیش کررہے تھے۔رات بھر شب خوانی کے بعدمنگل کو نماز فجر کے موقعہ پر زائرین کی ایک بڑی تعداد موئے پاک ؐکی زیارت سے فیضیاب ہوئے۔ان تقریبات کیلئے پولیس کے علاوہ کئی غیر سرکاری محکموں ، مسلم وقف بورڈ اور محکمہ صحت نے عقیدت مندوں کیلئے کھانے پینے کے چیزوں کا انتظام کیا تھا۔ جگہ جگہ رضاکار تنظیموں کی طرف سے لوگوں کیلئے مشروبات بھی دستیاب رکھی گئی تھیںاورانتظامیہ نے ان کیمپوں کو سڑکوں سے دور پارکوں اور کھلی جگہوں پر نصب کرنے کی ہدایت دی تھیں تاکہ درگاہ شریف آنے والے زائرین کو کسی بھی قسم کی مشکلات کا سامنا نہ کرنا پڑے۔شبِ معراج النبی ؐکی تقریب کے موقعہ پر شہر سرینگر اور تمام تحصیل وصدور مقامات پر بھی لوگوں نے رات بھر شب خوانی کی۔ جامع مسجد سرینگر ، چرار شریف، آثار شریف شہری کلاش پورہ ، زیارت مخدوم صاحب سرینگر، خانقاہ معلی، جناب صاحب صورہ ، زیارت دستگر صاحب سرائے بل سرینگر، مسجد مدنی رعناواری ، کھرم سرہامہ ، آثار شریف پنجورہ شریف ، اہم شریف بانڈی پورہ ،حشرو چاڈورہ، پانزن ،دیو باغ ، واگام ،نمتہ ہال ، کانیرہ ،رانگر ، زوہامہ ، زیارت خواجہ ہلال نسبل سمبل اور درگاہ عالیہ بارہمولہ میں بھی اس شب کی مناسبت سے خصوصی مجالس کا اہتمام کیا گیا جبکہ دیگر قصبوں میںاور دیہی علاقوں میں بھی اس حوالے سے بھی تقاریب اور خصوصی روح پرور مجالس کا اہتمام ہوا۔
معراج العالمؐ پر روح پرور مجالس کا اہتمام، شب خوانی کی محفلیں آراستہ
