نئی دہلی//کانگریس نے الزام لگایاہے کہ مودی حکومت تین طلاق کے معاملہ کو 'سیاسی فٹبال 'کی طرح استعمال کررہی ہے لیکن طلاق شدہ مسلم خواتین کے شوہروں کی جائیداد ضبط نہ کرکے انکے ساتھ ناانصافی کررہی ہے ۔کانگریس کے میڈیا انچارج رندیپ سنگھ سرجے والا نے مرکزی کابینہ کے تین طلاق پر تین سال کی سزا کے التزام والے آرڈیننس کو بدھ کے روزمنظوری دینے کے بعد یہاں صحافیوں سے کہاکہ مودی حکومت مسلم خواتین کو انصاف نہیں دلانا چاہتی ۔تین طلاق کے نام پر حکومت صرف سیاست کرناچاہتی ہے اس لئے اس سلسلہ میں آرڈیننس لیکر آئی ہے ۔ انھوں نے الزام لگایاکہ مودی حکومت مسلم خواتین کو انصاف نہیں دیناچاہتی اس لئے تین طلاق بل پر اس نے کانگریس کی ترمیم کو تسلیم نہیں کیا۔انھوں نے کہا،''مودی جی نہیں چاہتے کہ مسلم خواتین کو بھتہ ملے ،انکے بچوں کی پرورش کا پورا بندوبست ہو ۔ہم نے ترمیم پیش کی تھی کہ آپ جائیداد ضبط کیجئے ،اگرشوہر جیل چلا جائیگا ،تو غریب ،بے بس مسلم خاتون کو بھتہ کون دیگا ،اسکے بچوں کا خرچ کون دے گا ،اسکی روزی روٹی چلانے کا خرچ کون دے گا ۔اس لئے قانون میں ترمیم کو شامل کرنے کی تجویز ہم نے دی تھی ،لیکن مودی حکومت اسے سیاسی فٹبال زیادہ اور مسلم خواتین کے ساتھ انصاف کا معاملہ کم بناناچاہتی ہے ۔مسٹر سرجے والا نے کہاکہ مسلم خواتین کو انصاف دینے اور تین طلاق کی روایت کو ختم کرنے کے لئے سپریم کورٹ میں کانگریس کے لیڈروں نے وکالت کی تھی ۔تین طلاق ختم ہوچکا ہے ،تو اگلا معاملہ مسلم خواتین کے ساتھ انصاف کاہے ۔اس انصاف کے تحت انکو شوہر کی جائیداد سے بھتہ کا حق انھیں ملے ،بچوں کی پرورش ،کنبہ کی روزی روٹی اور خرچ کا پورا حق اسے ملے اور جو شوہر یہ نہ دے پائے ،اسکی جائیداد قرق ہو ،لیکن مودی حکومت ایسا کرنے سے گریز کررہی ہے ۔واضح رہے کہ کابینہ کے ذریعہ تین طلاق آرڈیننس کو منظور کئے جانے کے بعد وزیرقانون روی شنکر پرساد نے کانگریس پر تین طلاق کے تعلق سے ووٹ بینک کی سیاست کرنے کاالزام لگایااورکہاکہ وہ راجیہ سبھا میں اس سے متعلق بل کو منظور کرانے میں تعاون نہیں کررہی ہے اور اسی وجہ سے حکومت کو تین طلاق کو غیر قانونی بنانے کے لئے آرڈیننس کا سہارالینا پڑا ۔ادھر سابق اعلیٰ پولیس افسر اور عوامی وکاس پارٹی کے صدر شمشیر خان پٹھان نے مرکزی کابینہ کے ذریعہ تین طلاق آرڈننس کو توہین عدالت قرار دیا ہے ،کیونکہ سپریم کورٹ نے اس معاملہ میں پانچ مہینے میں قانون بنانے کا حکم دیا تھا اور اس لحاظ سے یہ آرڈننس غیر آئینی ہے ۔
معاملے کو ’سیاسی فٹبال ‘بنارہی ہے مودی حکومت :کانگریس
