مظفرآباد//امریکہ کی جانب سے حزب المجاہدین کو دہشت گرد تنظیموں کی فہرست میں شامل کرنے کیخلاف مظفرآباد میں امریکہ اور بھارت کے خلاف احتجاج کیا گیا۔ادھر نیشنل فرنٹ کے وائس چیئرمین اور انسانی حقوق کے رہنما الطاف حسین وانی نے امریکی فیصلے کو انصاف کا قتل قرار دیا ہے۔احتجاجی مظاہرے کے دوران برہان چوک میں امریکہ کے خلاف فلک شگاف نعرے بلند کئے گئے اور گھڑی پن تک ریلی نکالی گئی۔ مظاہرین میں متحدہ جہاد کونسل کے سیکرٹری جنرل شیخ جمیل الرحمان، نائب امیر جماعت اسلامی آزادکشمیر شیخ عقیل الرحمان، پاسبان حریت کے چیئرمین عزیر احمد غزالی، حزب المجاہدین کے کمانڈر محمد اصغر رسول، انٹرنیشنل فورم فار جسٹس اینڈ ہیومن رائٹس جموں کشمیر کے وائس چیئرمین مشتاق الاسلام، غلام اللہ آزاد،سماجی رہنما بشارت نوری، حامد جمیل، حمزہ شاہین اور مقصود کیانی سمیت سیاسی،سماجی، مذہبی شخصیات کے علاوہ سینکڑوں افراد نے شرکت کی ۔اس موقع پر خطاب کرتے ہوئے شیخ جمیل الرحمان نے کہا کہ متحدہ جہاد کونسل امریکہ کی جانب سے سید صلاح الدین احمد اور حزب المجاہدین پر لگائی جانے والی پابندیوں کو مسترد کرتی ہے۔ ان کا کہنا تھا کہ حزب المجاہدین کشمیر کے مقامی نوجوانوں پر مشتمل ایک ریاست گیر تنظیم ہے جو اپنی قوم کی آزادی کیلئے بھارتی افواج کیخلاف برسر پیکار ہے۔انہوں نے کہا کہ امریکہ نے اپنے معاشی مفاد کیلئے حزب المجاہدین پر پابندی لگائی جسے پوری کشمیری قوم مسترد کرتی ہے۔ ریلی کا اختتام گھڑی پن چوک میں ہوا۔اس دوران نیشنل فرنٹ کے وائس چیئرمین اور انسانی حقوق کے رہنما الطاف حسین وانی نے امریکہ کی طرف سے کشمیری کی عسکری تنظیم حزب المجاہدین کو دہشتگرد تنظیم قراردینے کے فیصلے کو انصاف کا قتل قرار دیتے ہوئے کہا ہے کہ امریکہ سٹیٹ دیپارٹمنٹ کا یہ اقدام عالمی قوانین کے منافی ہے ۔انہوں نے کہا کہ حزب المجاہدین کشمیرکی مقامی تنظیم ہے جو بھارت کے خلاف برسر پیکار ہے۔ الطاف وانی نے اپنے ایک بیان میں کہا ہے کہ کشمیری عوام اقوام متحدہ کے چارٹر کے مطابق اپنی آزادی کیلئے محو جدوجہد ہیں۔ عالمی برادری اور اقوام متحدہ نے کشمیریوں کو یہ حق دے رکھا ہے کہ وہ بیرونی طاقتوں کیخلاف اور اپنے مستقبل کے جدوجہد کریں۔ امریکہ کی طرف سے کسی بھی کشمیری تنظیم پر دہشتگردی کا لیبل چسپاںکرنا یواین او کی قراردادوں کے برعکس ہے۔ انہوں نے کہا ہے کہ کشمیرمتنازعہ ریاست ہے اور کشمیری یہ حق رکھتے ہیں کہ وہ بھارت کے خلاف اور اپنی جغرافیائی ،ریاستی اورقومی تشخص کی حفاظت کیلئے اپنی آواز بلند کرسکے۔ الطاف حسین وانی نے کہا ہے کہ حزب المجاہدین کشمیر کی مقامی اور سب سے بڑی مسلح تنظیم ہے اور گزشتہ 28 برس سے بھارتی کیخلاف برسر پیکار ہے۔
حزب میں مقامی نوجوان برسرِ پیکار
فریڈم پارٹی/دختران
سرینگر// فریڈم پارٹی اور دختران ملت نے حز ب الجاہدین کو بیرون ملکی گروپ قرار دینے کے فیصلے کو جانبدارانہ اور مضحکہ خیز قرر دیتے ہوئے کہا کہ حزب میں مقامی نوجوان برسرِپیکارہیں ۔فریڈم پارٹی ترجمان نے امریکہ کے فیصلے کو تاجرانہ قرار دیتے ہوئے کہا کہ ایک مقامی سطح کی تنظیم کو بیرون ملکی قرار دینے کا واحد مقصد بھارت کے ساتھ تجارتی مفادات کا تحفظ ہے اور اس طرح اقوام متحدہ کی اُس رولنگ کے خلاف بھی ہے جس میں مقامی سطح پر ظلم و جبر کے خلاف لڑنے اور حق خود ارادیت کے حصول کے لئے نبرد آزما تنظیموں کی جدوجہد کو جائز قرار دیا گیا ہے ۔ترجمان نے واضح کیا کہ امریکہ دنیا کی ایک بڑی قوت ضرور ہے لیکن بدلتے حالات میں اب امریکہ کے فیصلے کو حرف آخر کی حیثیت حاصل نہیں ہے اور نہ ہی ظلم جبر کے خلاف لڑنے والوں کو کسی اجازت نامے کی ضرورت ہے ۔دختران ملت نے کہا ہے کہ امریکہ مسلم مخالف موقف اور پالیسیوں کیلئے پہلے سے ہی بدنام ہے ،اسی لئے ان کی طرف سے حزب المجاہدین کو غیر ملکی دہشت گرد تنظیم قرار دئے جانے کی پوری مسلم دنیا کی طرف سے مذمت کی جانی چاہئے۔تنظیم کی جنرل سیکریٹری ناہیدہ نسرین نے کہا کہ امریکہ کا یہ تازہ حکمنامہ کسی حیرت کا موجب نہیں کیونکہ ٹرمپ کے برسر اقتدار آتے ہی ان کی مسلم دشمنی سے لوگوں کو آگاہ کیا گیاتھا اور یہ بھی کہا تھا کہ ٹرمپ کی حکومت میں مسئلہ کشمیر میں بہت تبدیلیاں آئیں گی ۔
