مصباح اور اور یونس کی جگہ لینے کے لئے بڑا ٹیلنٹ موجود : انضمام الحق

لاہور//پاکستان کرکٹ کے چیف سلیکٹر انضمام الحق نے کہا ہے پاکستان میں بڑا ٹیلنٹ موجود ہے اور مصباح الحق اور اور یونس خان کی جگہ نئے کھلاڑی لے لیں گے ۔یونس خان اور مصباح الحق سمیت دیگر کھلاڑیوں نے ویسٹ انڈیز کے خلاف بہت اچھا پرفارم کیا اور دونوں کھلاڑیوں کے کیریئر کا جیت پر اختتام کسی فیئر ویل سے کم نہیں لیکن بورڈ بھی ان دونوں عظیم کھلاڑیوں کو فئیر ویل دے گا۔ لاہور میں میڈیا سے گفتگو کرتے ہوئے انضام الحق نے ویسٹ انڈیز میں پہلی ٹیسٹ سیریز جیتنے پر اپنی قومی ٹیم کو مبارکباد پیش کرتے ہوئے کہا کہ ویسٹ انڈیز کے خلاف تینوں فارمیٹس میں کامیابی خوش آئند ہے اور امید ہے کہ قومی ٹیم چمپئنز ٹرافی میں بھی اچھا پرفارم کرے گی۔ پاکستان کے سابق کپتان نے کہا کہ مصباح اور یونس بڑے کھلاڑی ہیں، ان کی خدمات کو کبھی فراموش نہیں کیا جائے گا اور امید ظاہر کی کہ نئے کھلاڑی اپنی صلاحیتیں بروئے کار لاتے ہوئے ان کا خلا پر کرنے کی کوشش کریں گے ۔ انضمام نے مثال دیتے ہوئے کہا کہ عمران خان، وسیم اکرم اور وقار یونس کے بعد بھی لوگ سوچتے تھے کہ ان کی جگہ کون لے گا لیکن نئے کھلاڑی آتے رہتے ہیں۔ پاکستان میں ٹیلنٹ کی کمی نہیں اور امید ہے کہ نئے آنے والے کھلاڑی بھی قوم کا سر فخر سے بلند کریں گے ۔