مصباح الحق اور یونس خان کو آئی سی سی کی نیک خواہشات

دبئی // انٹرنیشنل کرکٹ کونسل(آئی سی سی) نے ویسٹ انڈیز کے خلاف فتح کی بدولت اپنے کیریئر کا یادگار انداز میں اختتام کرنے والے مصباح الحق اور یونس خان کو مبارکباد دیتے ہوئے ان کیلئے نیک خواہشات کا اظہار کیا ہے ۔ آئی سی سی کے چیف ایگزیکٹو ڈیوڈ رچرڈسن نے کہا کہ مصباح اور یونس نے پاکستان کیلئے چند یادگار اننگز کھیلیں جس کی بدولت انہوں نے مقبولیت حاصل کی اور دنیا بھر میں ان کو سراہا گیا۔ انہوں نے کہا کہ مصباح الحق نے مشکل وقت میں ٹیم کی قیادت سنبھالی اور پاکستان کو ٹیسٹ کی نمبر ایک ٹیم بنایا، وہ ایک بہترین اسپورٹس مین، رول ماڈل اور 2016 میں آئی سی سی کا اسپرٹ آف کرکٹ ایوارڈ جیتنے کے مستحق تھے ۔ اس موقع پر انہوں نے ٹیسٹ کرکٹ میں سب سے زیادہ رنز بنانے والے پاکستانی بلے باز یونس خان کی بھی تعریف کرتے ہوئے کہا کہ یونس پاکستان کرکٹ کی تاریخ کے بہترین بلے بازوں میں سے ایک ہیں جنہوں نے ہوم گراؤنڈ پر سری لنکا کے خلاف ٹرپل سنچری کے ساتھ ہندوستان کے خلاف اسی کی سرزمین پر ڈبل سنچری بنا کر سیریز برابر کی تھی اور ان کی تسلسل سے شاندار کارکردگی انہیں دیگر کھلاڑیوں سے ممتاز کرتی ہے ۔ یونس خان کو تمام فارمیٹس میں پاکستان کی نمائندگی کا اعزاز بھی حاصل ہے اور انہی کی زیر قیادت پاکستان نے 2009 میں ورلڈ ٹی20 چمپئن بننے کا اعزاز حاصل کیا تھا۔ڈیوڈ رچرڈسن نے کہا کہ میں شاندار کیریئر پر دونوں کھلاڑیوں کو مبارکباد دیتے ہوئے آنے والے زندگی میں ان کیلئے نیک خواہشات کا اظہار کرتا ہوں۔