سرینگر//سٹیٹ مشن ڈائریکٹوریٹ آئی سی ڈی ایس نے یونیسف کے اشتراک سے ’’ارلی چائیلڈ ہُڈ اینڈ کیئر ایجوکیشن‘‘( ای سی سی ای) کے موضوع پر دو روزہ ورکشاپ کا اہتمام کیا۔یہ ورکشاپ وادی میں اپنی نوعیت کا پہلا ورکشاپ ہے جس کا مقصد آئی سی ڈی ایس کے فیلڈ سٹاف کو بچوں کی نگہداشت اور خوراک فراہم کرنے کے بارے میں تربیت دینا ہے۔یونیسف کے ماہرین اور پروگرام افسرز، جموں اور کشمیر کے آئی سی ڈی ایس کے پروجیکٹ افسران، ماسٹر ٹرینرز، ہیلتھ افسران، سُپر وائزرز و دیگر عملہ نے ورکشاپ میں حصہ لیا۔ماہرین بچوں کی بنیادی تعلیم اور خوراک کے بارے میں دو دنوں کی ورکشاپ کے دوران خطاب کریںگے۔اس موقعہ پر تقریر کرتے ہوئے مشن ڈائریکٹر آئی سی ڈی ایس جی اے صوفی نے کہا کہ ای سی سی ای کی عمل درآمد کے نتیجہ میں چھوٹے بچوں کو نہ صرف معیاری تعلیم حاصل ہوگی بلکہ ان میں خود اعتمادی کا جذبہ بھی پیدا ہوگا۔آنگن واڑی ورکرس اور ہیلپرس کے رول پر روشنی ڈالتے ہوئے مشن ڈائریکٹر نے کہا کہ حکومت دو سے چھ سال تک کی عمر کے بچوں کو آنگن واڑی سینٹروں کے ذریعے تمام تر مواقعے فراہم کر رہی ہے۔ انہوں نے کہا کہ جو بچے ای سی سی ای میں حصہ لے رہے ہیں ان میں اعتماد سازی اور ذہین ذہن پیدا ہونا قدرتی عمل ہے۔صوفی نے کہا کہ بچوں کو گھر کے صحت مند ماحول کے ساتھ ساتھ تعلیمی اداروں میں بہتر نگہداشت فراہم کی جانی چاہئے۔ڈائریکٹر این آئی پی سی سی ڈی لکھنؤ ڈاکٹر ڈی ڈی پانڈے نے ورکشاپ کے خطبہ استقبالیہ کے دوران کہا کہ بچوں کا حق ہے کہ اُن کو انتہائی آزاد ماحول میں پنپنے کا موقعہ ملے اور آر ٹی ای ایکٹ2010 بچوں کو بنیادی تعلیم حاصل کرنے کا حق دیتا ہے۔انہوں نے کہا کہ مرکزی سرکار نے نیشنل ارلی چائلڈ ہُڈ کیئر اینڈ ایجوکیشن( این ای سی سی ای) کو2013میں منظوری دی اور پالیسی کے فریم ورک میں قومی کریکیولم فریم ورک اور ای سی سی ای کیلئے کوالٹی سٹینڈرڈس وضع کئے ہیں۔ یونیسف کے تعلیمی ماہر امیتا ٹنڈ ن نے آئی سی ڈی ایس کی اس کوشش کو سراہا جس کے تحت دو روزہ ورکشاپ کا اہتمام کیا گیا ہے ساتھ میں انہوں نے کشمیری لوگوں کی مہمان نوازی کی بھی تعریف کی۔یونیسف کی طرف سے ڈائریکٹر ،وکرم شلا ایجوکیشن ریسورس سوسائٹی کولکتہ، شبرا چیٹرجی، ایسوسی ایٹ پروفیسر انسٹی چیوٹ آف ہوم سائنس یونیورسٹی آف دہلی، پروفیسر گیتا چوپڑا، سنیئر منیجر، ارلی ایجوکیشن آئی سی ایف انٹر نیشنل ڈاکٹر انوبھا راجیش، ای سی سی ای کنسلٹنٹ ساوتری سنگھ، ایسوسی ایٹ پروفیسر اگنو ڈاکٹر ریکھا شرما سین، ڈپٹی ڈائریکٹر آئی سی ڈی ایس کشمیر رشیدہ اختر اور دیگر متعلقہ سنیئر افسران اس موقعہ موجود تھے۔
مشن ڈائریکٹوریٹ آئی سی ڈی ایس اور یونیسف کا2 روزہ ورکشاپ
