سرینگر//شیعہ سنی کاڈنیشن کمیٹی کا اہم اجلاس امام باڑہ شمس واری خانقاہ معلی سرینگر منعقد ہوا جس میں اہلسنت اور اہل تشیع طبقہ سے تعلق رکھنے والی مختلف شخصیات اور دینی، سیاسی و مذہبی جماعتوں اور تنظیموں کے سربراہان اور نمایندگان نے شرکت کی۔ ا تحادالمسلمین کے اہتمام سے منعقدہ اجلاس کی صدارت مولانا مسرور عباس انصاری نے کی ۔ جن دینی و سیاسی جماعتوں اور سماجی تنظیموں کے سربراہاں اور نمایندگان نے اجلاس میں شرکت کی ان میں حریت (ع) چیئرمین میرواعظ عمر فاروق کے نمائندے مولانا سعید الرحمان شمس، لبریشن فرنٹ کے شیخ عبد الرشید ،لبریشن فرنٹ (حقیقی) چیئرمین جاوید احمد میر ، پیپلز پولیٹکل پارٹی سربراہ انجینئرہلال احمد وار، مسلم کانفرنس کے ایک دھڑے کے کارگذار صدر جہانگیر غنی بٹ، جمعیت ہمدانیہ صدر عبد الرشید گانی، خادم زیارت شاہ ہمدان محمد یاسین زہرہ، نمایندہ اوقاف امامیہ چھتہ بل، نمایندہ چیرمیب مسجد میر سید محمد ہمدانی معراج الدین شاہ، انجمن جعفریہ شمس واری، نمایندہ پتھر مسجد اسلام یارہ بل شبیر حسین ڈار، حسینی پیپلز کونسل کے سیکریٹری محمد علی شجاع وغیرہ شامل ہے۔ مولانا مسرور انصاری نے ایجنڈا پیش کرتے ہوئے کہاکہ نواسہ رسول مقبول ؐسید الشہداء حضرت امام حسین ؑکی عظیم الشان شہادت اور قربانیوں کو نذرانہ عقیدت پیش کرنے کیلئے مسلمانوں کے تمام مسالک اور مکاتب فکر اپنا مخصوص طریقہ اور لائحہ عمل اختیار کرتے ہیں۔ محرم الحرام کے پروگراموں کی عمل آوری، ان کے شایان شان اور پر امن انعقاد کے لئے اپنی اپنی تجاویز پیش کرتے ہوئے اجلاس میں موجود شرکاء نے کہا کہ حضرت امام حسین ؑ کسی خاص مسلک کی جاگیر نہیں بلکہ ملت اسلامیہ کے لئے ایک عظیم سرمایہ ہے اور کربلا کی تحریک بلا مذہب و ملت دنیا کی ہر مظلوم و محکوم قوم اور ستم رسیدہ افراد کے لئے درس حیات ہے۔ مقررین نے کہا کہ محرم وحدت کو زیادہ سے زیادہ مستحکم رکھنے کا درس دیتا ہے جسے بھارتی حکومت، بی جے پی اور ریاست میں اس کی حلیف جماعتیں پارہ پارہ کرنے کے درپے ہیں لہٰذا اس موقعہ پر عوام الناس سے اپیل کی گئی کہ ان ایام متبرکہ کے دوران آپسی بھا ئی چارہ، اُخوت اور یکسانیت کا ماحول پیدا کرکے مسلمان اور توحید پرست ہونے کا ثبوت دیں۔ مختلف مسالک کے علماء اور خطباء سے بھی اپیل کی گئی کہ ایک دوسرے کے خلاف فتویٰ بازی سے پرہیز کریں اور مسلکی منافرت پیدا کرنے اور کفریہ فتاوی جاری کرنے کی بجائے آپسی رواداری اور اتحاد ملت کے لئے سعی و کوشش کریں۔اجلاس میں تاریخی محرم جلوسوں پر تین دہائیوں سے جاری بلا جواز پابندی کی شدید الفاظ میں مذمت کی۔
مسلکی منافرت پھیلانے والوںسے خبردار رہنے کی ضرورت
