واشنگٹن //امریکی وزیر خارجہ ریکس ٹلرسن نے کہا ہے کہ شام کے صدر بشار الاسد اور اْن کے اہل خانہ کا ملک کے مستقبل میں ’’کوئی کردار نہیں ہے‘‘۔اپنے موجودہ دورے کی آخری منزل، جنیوا میں ٹلرسن نے اخباری نمائندوں کو بتایا کہ ’’امریکہ مکمل اور متحد شام کے حق میں ہے جس میں حکومت میں رہنے کے سلسلے میں بشارالاسد کا کوئی کردار نہیں ہے‘‘۔بقول اْن کے، ’’اسد خاندان کی حکمرانی ختم ہونے والی ہے۔ صرف ایک ہی معاملہ باقی ہے کہ یہ مرحلہ کیسے آتا ہے‘‘۔ٹلرسن نے یہ بیان اقوام متحدہ کے ایلچی برائے شام، استفان ڈی مستورا سے ’’بامعنی‘‘ گفتگو کے بعد دیا۔ حالیہ دِنوں کے دوران روسی حمایت یافتہ افواج کی مدد سے لڑائی کے میدان میں ہونے والی برتری کو مدِ نظر رکھتے ہوئے، مستورا آئندہ چند ہفتوں میں اقوام متحدہ کی سرپرستی میں امن بات چیت کا انعقاد کرنے والے ہیں۔ٹلرسن کے کثیر ملکی دورے کے اختتام پر وہ جنیوا پہنچے ہیں، جس دوران پیر کو اْنھوں نے بغیر اعلانیہ عراق اور افغانستان کا دورہ کیا۔دریں اثنا ء ٹلرسن نے میانمار کے فوجی سربراہ من آنگ ہالیانگ سے بات چیت میں صوبہ رخائن میں روہنگیا مسلمانوں کے خلاف جاری تشدد پر تشویش کا اظہار کیا ہے ۔
مستقبل میں اسد کا کوئی کردار نہیں: ٹلرسن
