مسئلہ کشمیریوں کی خواہشات کے مطابق حل ہو:باسط

 نئی دلی// پاکستانی ہائی کمشنر عبدالباسط کا کہنا ہے کہ آزادی کی تحریکوں کووقتی طورپردبایا تو جاسکتا ہے لیکن دائمی طور پر ختم نہیں کیاجاسکتا اس لیے ہمیں یقین ہے کہ کشمیری عوام کی جدوجہد ضرور کامیاب ہوگی۔یوم پاکستان  کے موقع پر بھارت میں پاکستانی ہائی کمیشن میں پرچم کشائی کی تقریب ہوئی جس میں پاکستانی ہائی کمشنر عبدالباسط نے بھارت میں موجود تمام پاکستانیوں کومبارکباد دیتے ہوئے کہا کہ قائداعظم کی ولولہ انگیزقیادت میں برصغیرکے مسلمانوں نے آزادی کے خواب کی تعبیر پائی۔ انہوں نے کہا کہ پاکستان کو صحیح معنوں میں فلاحی مملکت بنانیکی ذمہ داری ہم سب پرعائد ہوتی ہے۔ انہوں نے کہا کہ امن پاکستان اوربھارت دونوں کے مفاد میں ہے اور معنی خیزمذاکرات سے ہی دیرپا امن یقینی بنایا جاسکتا ہیجب کہ بھارت سے مذاکرات کی خواہش کمزوری نہیں بلکہ ہماری طاقت ہے۔عبدالباسط نے کہا کہ پاکستان جموں کشمیر سمیت تمام تصفیہ طلب مسائل کاحل بات چیت سے چاہتا ہے، دوطرفہ مسائل پرہماراموقف اصولی اورعالمی قوانین کیمطابق ہے۔ انکا کہنا تھا کہ پاکستان بھارت سے تعلقات کی بہتری کے لیے پر امید ہے اور دونوں ممالک کے درمیان تمام تنازعات پرامن طریقے سے حل کریں گے بالخصوص جموں کشمیر کا تنازع ،جس کو کشمیری عوام کی امنگوں کے مطابق حل کیا جائے گا۔ انہوں نے کہا کہ آزادی کی تحریکوں کووقتی طورپردبایا تو جاسکتا ہے لیکن دائمی طور پر ختم نہیں کیاجاسکتا اور ہمیں یقین ہے کہ کشمیری عوام کی جدوجہد ضرور کامیاب ہوگی۔