بھارتیہ جنتا پارٹی اور کانگریس کے درمیان کشمیر کے حوالے سے الفاظ کی جو جنگ شروع ہوئی اسکے نتیجہ میں کئی باتیں سامنے آرہی ہیں۔ سب سے بڑی بات یہ ہے کہ بھاجپا جموںوکشمیر کو حاصل اٹانومی کو آزادی سے تعبیر کر رہی ہے، جبکہ پارٹی کے صدر کا یہ ماننا ہے کہ کانگریس پارٹی علیحدگی پسند وں کی حمایت کر رہی ہے۔ یہ سب ایک ایسے وقت پر ہو رہاہے جب مرکزی حکومت نے کشمیر حل کی تلاش کےلئے خصوصی مذاکرات کار تعینات کرکے انہیں مسئلہ کشمیر کے تمام فریقین کے ساتھ بات چیت کرنے کا اختیار دیا ہے۔ ظاہر بات ہے کہ اس طرح یہ تاثر دینے کی کوشش کی جارہی ہے کہ مرکزی حکومت کشمیر میں صورتحال کو سنبھالنے کےلئے سنجیدہ ہے اور تازہ اقدام گزرے مہینوں میں وزیر داخلہ راج ناتھ سنگھ کی جانب سے دورہ کشمیر کے دوران مسئلہ کے حل کی خاطر کئے گئے اعلان کو آگے بڑھانے کا ایک سلسلہ ہے۔ مذاکرات کا ردنیشور شرما کی تقرری کے ساتھ ہی اس مسئلے پر سیاسی جماعتوں کی جانب سے متضاد بیانات اور خیالات سامنے آگئے اور انکے مفوضہ مشن پر کھلم کھلا شکوک و شبہات کا اظہار کیا گیا، لہٰذا اسکے نتائج کے بارے میں کچھ کہنامشکل ہے۔خاص کر مین اسٹریم جماعتوں نیشنل کانفرنس اور کانگریس نے جس عنوان سے انکے مشن اور اسکے عزائم کو واضح طور پر مشکوک قرار دیا اُ س پر دونوں خیموں میں بیان بازی کی جنگ تیز ہو گئی ہے۔ سابق یو پی اے وزیر داخلہ پی چدمبرم نے جموںوکشمیر سے چھینی گئی اٹانومی کو کشمیر کا حل جتلا یا تو وزیراعظم مودی نے کھلم کھلا اُن پر علیحدگی پسندوں کی پشت پناہی کرنے کا الزام لگایا، اس طرح اگر یہ کہا جائے کہ وزیراعظم کے نزدیک اٹانومی کی بحالی کا مطالبہ آزادی مانگنے کے برابر ہے تو شاید غلط نہ ہوگا۔ اس میں کوئی شک نہیں کہ ریاست کی داخلی خود مختاری کے حوالے سے بی جے پی کا نظریۂ ابتدائے آفرنیش سے منفی رہا ہے، بلکہ وہ بچی کھچی اٹانومی کے خاتمے کو اپنے ایجنڈا حصہ اہم مانتے چلے آتے ہیں، تاہم پی ڈی پی کے ساتھ مخلوط حکومت بناتے وقت جو ایجنڈا آف الائنس دونوں جماعتوں کے درمیان طے پایا تھا، اُس میں طے تھا کہ اُن معاملات کے ساتھ چھیڑچھاڑ نہیں کی جائیگی، جس پر دونوں جماعتوں کے نظرئیات متضاد ہیں ، جبکہ نہ صرف ریاست کے کھوئی ہوئی داخلی خود مختاری کی بحالی پی ڈی پی کے ایجنڈا کا بنیادی حصہ ہے بلکہ پاکستان کے ساتھ مذاکرات کے ذریعہ مسئلہ کا حل تلاش کرکے ریاست کے سینے پر کھینچی حد متارکہ، جو روزنہ بنیادوں پر خونی کھیل کا میدان بنی ہوئی ہے، کو غیر متعلق قرار دنیا سابق وزیر اعلیٰ مفتی محمد سعید سے لیکر موجودہ قیادت تک وظیفہ زبان رہا ہے۔ مگر اس نئی صورتحال میں ایسا محسوس ہو رہا ہے کہ بی جے پی نے اپنی شریک اقتدار جماعت کے ساتھ طے پائے قول و قرار سے کھلم کھلا علیحدگی کا اعلان کر دیا ہے۔ فی الوقت ملک کی کئی ریاستوں میں انتخابات کی تیاریاں ہو رہی ہیں اور ان ریاستوں میں الیکشن مہم کے دوران اب کھلے بندوں جموںوکشمیر کو انتخابی حربہ کے طور پر استعمال کیا جا رہا ہے۔ جبھی بی جے پی صدر نے ہمارچل پردیش میں ایک انتخابی جلسے میں کانگریس اور کشمیر کے مزاحمتی خیمے کو ایک ہی سکے کے دو رُخ قرار دیا ۔ ظاہر بات ہے کہ کشمیر کے حوالے سے نفرت کی سیاست کو ہوا دیکر بھاجپا کانگریس کو پچھاڑنے کی کوشش میں مصروف ہے۔ تجزیہ نگاروں نے چدمبرم اور نریندر مودی کے مابین اٹانومی کے معاملے پر الزام تراشیوں کو بھی اسی انتخابی سیاست کا حصہ قرار دیا ہے۔ بی جے پی قائدین کی جانب سے کانگریس پر یہ الزام عائد کیا جا رہاہے کہ جموںوکشمیر کی موجودہ صورتحال کے لئے کانگریس ذمہ دار ہے اور بقول انکے اگر آزاد بھارت کے پہلے وزیر داخلہ سردار پٹیل، جنہوں نے کئی سودیسی ریاستوں کو ملک میں ضم کر دیا ،کے کہنے پر پہلے وزیراعظم پنڈت نہرو نے عمل کیا ہوتا تو جموںوکشمیر کا ملک کے ساتھ مکمل انضمام ہوا ہوتا۔ یہ پنڈت نہرو کی خطا ہے کہ انہوں نے دفعہ370کے تحت کشمیر کی داخلی خود مختاری کو تحفظ فراہم کیا، جس کا نتیجہ کشمیر کی موجودہ مزاحمتی تحریک ہے۔ یہ کہتے ہوئے بھاجپا یہ کہنے سے گریز نہیں کرتی کہ 1953میں ریاست کے ایک منتخب وزیراعظم کو رات کے اندھیرے میں کس جماعت نے گرفتار کرکے جیل میں ڈال دیا۔ وزیراعظم اور صدر ریاست کے عہدوں کو کس نے وزیراعلیٰ اور گورنر سے مبدل کر دیا نیز ریاست کو دی گئی اٹانومی کو کس نے رفتہ رفتہ ختم کر دیا۔ یہ بھی نہیں کہا جاتا کہ ماضی میں مذاکرات کا ری کے نتیجہ میں اٹانومی کی بحالی اور افسپا کے خاتمہ کے حوالے سے رپورٹوں کو کس جماعت نے کوڑے دان کی نذر کر دیا ۔ ظاہر ہے کہ ایسا کانگریس نے ہی کیا اور گزشتہ 27برسوں کے دوران کشمیریوں کو کیا کچھ دیکھنا پڑا،اس میں کیا کانگریس کا کوئی رول نہیں ہے؟۔ ان باتوں سے صاف ظاہر ہوتا ہے کہ کشمیر مسئلے کو انتخابی سیاسی شطرنج کا مہرہ بنا کر جمہوریت اور انسانی اقتدار کا سر عام نیلام کیا جا رہاہے اور ریاست میں قیام امن اور فوز و فلاح کی ساری کوششوں کی حقیقت کی پول کھل جاتی ہے۔
مسئلہ کشمیراور انتخابی شطرنج کی بساط!
