سرینگر//بادامی باغ چلو کال کے پیش نظر پولیس نے مزاحمتی خیمے سے وابستہ لیڈروں اور کارکنوں کی خانہ و تھانہ نظر بند ی کا سلسلہ جاری رکھا ہے۔ مسلم خواتین مرکز کی سربراہ یاسمین راجہ کی گرفتاری بھی احتجاج کے دوران پیر کو عمل میں لائی گئی۔اس سے قبللبریشن فرنٹ کے زونل نائب صدر محمد یاسین بٹ، نائب چیئرمین شوکت احمد بخشی، زونل صدر نور محمد کلوال، زونل آرگنائیز بشیر احمد کشمیری کو گزشتہ دنوں ہی گرفتارکیا ۔ تحریک حریت کے محمد اشرف لایا اورامتیاز حیدر ، پیپلز لیگ کے نائب چیئرمین محمد یاسین عطائی،مسلم لیگ کے بشیر بڈگامی اور مزاحمتی کارکن غازی جاوید بابا کو بھی پہلے ہی گرفتار کر کے مختلف تھانوں میں بند رکھا گیا ہے۔اس دوراناسلامک پولٹکل پارٹی کے چیرمین محمد یوسف نقاش کو کل رات پولیس نے چھاپے کی ایک کاروائی کے دوران گرفتار کرلیا ۔ترجمان کے مطابق صفاکدل پولیس تھانے کے اہلکاروں نے کل رات شبانہ چھاپے میں انہیں گرفتار کرلیا اور پولیس اسٹیشن صفاکدل میں بند رکھا ۔ان کے ساتھ جے کے ایل ایف کے ایک اور کارکن غلام محمد ڈار کو بھی پولیس نے گرفتار کرکے تھانے میں بند رکھا ۔اس دوران انجمن شرعی شیعیان کے ترجمان نے غلام محمد ناگو اوردیگر حریت کارکنوں کی گرفتاری کو بلا جواز قرار دیتے ہوئے کہا کہ وادی میں شہری ہلاکتوں کا سلسلہ جاری ہے اور فورسز کو کشمیریوں کے قتل عام کی کھلی چھوٹ دے دی گئی ہے ۔بیان میں کہا گیا ہے کہ عوامی رد عمل کو روکنے کیلئے حریت قائدین کی خانہ نظر بندیاں اور کارکنوں کی گرفتاریاں زخموں پر نمک پاشی کے مترادف ہے۔
مزاحمتی قائدین و کارکنان خانہ و تھانہ نظر بند
