عظمیٰ نیوز سروس
جموں//مرکزی وزیر داخلہ امت شاہ جموں و کشمیر میں سیکورٹی کی صورتحال کا جائزہ لینے اور پونچھ میں گولہ باری سے متاثرہ لوگوں تک پہنچنے کے لئے سخت سیکورٹی انتظامات کے درمیان جمعہ کی شام یہاں پہنچے۔ آپریشن سندور کے بعد شاہ کا یونین ٹیریٹری کا یہ پہلا دورہ ہے۔جموں پہنچنے کے فورا ًبعد شاہ کا ہوائی اڈے پر لیفٹیننٹ گورنر منوج سنہا نے استقبال کیا اور سیدھے راج بھون چلے گئے۔شاہ دیر رات گئے راج بھون میں ایک اعلی سطحی سیکورٹی جائزہ میٹنگ کی صدارت کریں گے۔ انہوں نے بتایا کہ ڈیڑھ گھنٹے کی میٹنگ میں لیفٹیننٹ گورنر کے علاوہ فوج، نیم فوجی دستوں، پولیس، انٹیلی جنس ایجنسیوں اور سول انتظامیہ کے اعلی حکام بھی شرکت کریں گے۔امیت شاہ سلامتی کی صورتحال اور دہشت گردی کے خلاف جاری کارروائیوں پر تبادلہ خیال کے علاوہ وہ 3 جولائی سے شروع ہونے والی امرناتھ یاترا سے متعلق سیکورٹی اور انتظامی اقدامات کا جائزہ لیا۔جموں میں ایک رات قیام کے بعد، شاہ جمعہ کو پونچھ جائیں گے اور گولہ باری سے متاثرہ خاندانوں سے بات چیت کریں گے۔حکام نے بتایا کہ وہ تباہ شدہ مذہبی مقامات بشمول سنگھ سبھا گوردوارہ کا بھی دورہ کریں گے اور سب سے زیادہ متاثرہ ضلع میں ہونے والے نقصان کا جائزہ لینے کے لیے افسران کے ساتھ میٹنگ کریں گے۔وزیر موصوف پونچھ میں بارڈر سیکورٹی فورس کیمپ کا بھی دورہ کریں گے اور جوانوں سے بات چیت کریں گے۔وہ پونچھ میں ڈاک بنگلہ میں پاکستانی گولہ باری سے متاثرہ شہریوں اور اپنے یونٹ ہیڈ کوارٹر میں بی ایس ایف کے جوانوں سے خطاب کریں گے۔انہوں نے کہا کہ شاہ گولہ باری میں ہلاک ہونے والے شہریوں کے قریبی رشتہ داروں میں تقرری کے خطوط تقسیم کرنے کا امکان ہے۔
