یو این آئی
نئی دہلی// صدر جمہوریہ دروپدی مرمو جمعہ کو’ایم ایس ایم ای ڈے 2025- ادیمی بھارت پروگرام‘کا افتتاح کریں گی۔انتہائی چھوٹی، چھوٹی اور درمیانہ درجے کی صنعتوں کی مرکزی وزارت نے جمعرات کو یہاں کہا کہ پروگرام میں مرمو مائیکرو اور چھوٹے کاروباری اداروں (ایم ایس ای) کو قرض کی امداد فراہم کرنے کے لیے کریڈٹ گارنٹی فنڈ ٹرسٹ (سی جی ٹی ایم ایس ای) کے 25سال مکمل ہونے کی یاد میں ایک خصوصی ڈاک ٹکٹ جاری کریں گی۔ اس کے علاوہ صدر آن لائن ڈسپیوٹ ریزولوشن (اوڈی آر) پورٹل کی بھی نقاب کشائی کریں گی۔ مرمو ایم ایس ایم ای ہیکاتھون 5.0 کا بھی آغاز کریں گی۔ پروگرام میں ہیکاتھون 4.0 کے نتائج کا اعلان بھی کیا جائے گا۔پروگرام میں صدر جمہوریہ ‘ایم ایس ایم ای میگزین’ اور ایک کتابچہ ‘اپنے قرض دہندہ کو جانیں’ جاری کریں گی۔انتہائی چھوٹی، چھوٹی اور درمیانہ درجے کی صنعتوں کے مرکزی وزیرجیتن رام مانجھی، وزیر مملکت شوبھا کرندلاجے اور کھادی اور دیہی صنعت کمیشن کے چیئرمین منوج کمار کے ساتھ ساتھ وزارت اور اس کی تنظیموں کے افسران بھی اس پروگرام میں شرکت کریں گے ۔
