ایم ایم پرویز
رام بن//رام بن پولیس نے ایک بین ریاستی اور مرکز کے زیر انتظام علاقے کی سطح کے چوری گینگ کے سرغنہ کو گرفتار کیا ہے جو کئی اضلاع میں مذہبی مقامات کو نشانہ بنانے کے لیے بدنام ہے۔ملزم کی شناخت محمد اسلم کسانہ ولد بیر محمد کسانہ کے طور پر کی گئی ہے اور وہ ستورا، ہیرا نگر، کٹھوعہ کا ساکن ہے۔ پولیس ذرائع کے مطابق کسانہ ایک منظم سنڈیکیٹ کا ماسٹر مائنڈ ہے جو مندروں، گمپاز اور دیگر مذہبی اداروں میں چوریوں کے سلسلے میں ذمہ دار ہے۔ گرفتاری پولیس سٹیشن بٹوت کی ایک خصوصی ٹیم کے ذریعہ کی گئی تھی، جس نے مخصوص انٹیلی جنس پر تیزی سے کارروائی کی۔ ٹیم نے ایک جال بچھایا اور اتوار کو ملزم کو کامیابی سے گرفتار کرلیا۔ ابتدائی پوچھ گچھ کے دوران کسانہ نے مبینہ طور پر مختلف پولیس دائرہ اختیار میں درج متعدد چوری کے مقدمات میں ملوث ہونے کا اعتراف کیا۔ وہ متعدد ایف آئی آرز کے سلسلے میں مطلوب تھا، جن میں ایف آئی آر نمبر 27آف 2018(پولیس سٹیشن بٹوت)، ایف آئی آر نمبر 43 آف 2022 (پولیس سٹیشن رام نگر)، ایف آئی آر نمبر 16آف 2025(پولیس سٹیشن زنسکار)، اور ایف آئی آر نمبر 150 آف 2025 شامل ہیں۔کسانہ کو اس کے خلاف درج کیے گئے تازہ ترین کیس کی مزید تحقیقات کے لیے پولیس سٹیشن رہمبل، ادھم پور کی ایک ٹیم کے حوالے کیا گیا تھا۔ انہوں نے کہا کہ یہ گرفتاری مجرمانہ نیٹ ورکس کو ختم کرنے کی جانب ایک اہم قدم ہے جو مذہبی اداروں کو نشانہ بناتے ہیں، جو کمیونٹیز کے لیے بہت زیادہ ثقافتی اور جذباتی اہمیت رکھتے ہیں۔پولیس نے کہا کہ گروہ کے دیگر ارکان کی شناخت اور چوری کی وارداتوں سے منسلک مسروقہ املاک کو برآمد کرنے کے لیے مزید تفتیش جاری ہے۔
