فردوس شاہ گرفتار
سرینگر//ڈیموکریٹک پولٹیکل مومنٹ کے ایک دھڑے کے چیئرمین فردوس احمد شاہ کو گرفتار کیا گیاہے۔ پارٹی کے سیکریٹری عبدالخالق بڈگامی نے چیئرمین کی گرفتاری کی مذمت کی ہے اور اسے انتظامیہ کی بوکھلاہٹ سے تعبیر کیا ہے۔
اوپی شاہ کئی مزاحمتی لیڈران سے ملاقی
سرینگر// سماجی کارکن او پی شاہ نے سنیچر کو مسلم کانفرنس کے ایک دھڑے کے چیئرمین شبیر احمد ڈار، محاز آزادی کے ایک دھڑے کے صدر محمد اقبال میر، ینگ مینز لیگ چیئرمین امتیاز احمد ریشی اور تحریک استقامت کے چیئرمین غلام نبی وارسے ملاقات کی۔موصولہ بیان کے مطابق مزاحمتی لیڈروں نے او پی شاہ کوبتایا کہ بھارتی ظلم و جبر سے کشمیر ی عوام کومرعوب نہیں کیا جا سکتا ہے بلکہ انکی زیادتیوں کے باوجود تحریک آزادی اپنے منطقی انجام تک پہنچے گی ۔
ظفر بٹ کی رہائی کا مطالبہ
سرینگر// سالویشن مومنٹ کے خواتین شعبہ نے پارٹی سربراہ ظفر اکبر بٹ کی رہائی کی مانگ دہراتے ہوئے کہا ہے کہ ریاستی انتظامیہ نے پُرامن سیاسی سرگرمیوں پر پابندیاں عائد کرکے سیاسی گٹھن کا ماحول پیدا کر رکھا ہے ۔موصولہ بیان میںظفر اکبر اور دیگر سیاسی قائدین کی فوری رہائی پر زور دیتے ہوئے کہا گیا ہے کہ کسی بھی جمہوری ماحول میںاس طرح کی پابندیوں کا کوئی جواز نہیں ۔ بیان میںظفر اکبر کی گرفتاری کی مذمت کرتے ہوئے کہا ہے کہ انہیں حال ہی میں پندرہ دنوں کی نظر بندی کے بعد رہا کیا گیا تھا ۔
کولگام اور بانڈی پورہ میں8جولائی کو لوک عدالت
کولگام+بانڈی پورہ//کولگام اور بانڈی پورہ میں8جولائی کو قومی لوک عدالتوں کا اہتمام ہورہاہے جس میں بنک رکوری،اےم اے سی ٹی،ازدواجی ،حصول اراضی،بجلی اورپانی کے بل،ریٹائرمنٹ کے فوائد،مال اور دیگر متنازعہ معاملات افہام وتفہیم سے نمٹائے جائیں گے۔ایسے خواہشمند افرادجو اس لوک عدالت میں معاملات حل کرانے کے خواہاں ہیں ،سے کہا گیا ہے کہ وہ 8جولائی سے پہلے ہی چیئرمین ڈسٹرکٹ لیگل سروسز اتھارٹی کولگام کے ساتھ رابطہ قائم کریں۔
ہمارا مکان چھڑوانے میں اپنا کردار ادا کریں
خان سوپوری کے اہل خانہ کی عالمی ریڈکراس سے اپیل
سرینگر// پیپلز لیگ کے محبوس چیئرمین غلام محمد خان سوپوری کے اہل خانہ نے حکومت کی طرف سے پچھلے 5 برسوںسے اُن کے گھر کو لگاتار سربمہر رکھنے اور خان سوپوری کی مسلسل نظربندی کو انسانی حقوق کی بدترین خلاف ورزی قرار دیتے ہوئے عالمی ریڈکراس کمیٹی اور انسانی حقوق کی تحفظ کیلئے کام کرنے والے عالمی اور مقامی تنظیموں سے اپیل کی ہے کہ وہ اپنی خاموشی توڑ کر سربمہر مکان چھڑوانے میں اپنا کردار ادا کریں ۔ اہل خانہ نے کہا ہے کہ دنیا میں ہندوستان واحد ملک ہے جہاں سیاسی نظریات کی بنا پر ایک فرد واحدکوبزورطاقت اپنے ہی گھر سے اہل خانہ سمیت بے دخل کیا گیا ۔اہل خانہ نے مزید کہا ہے کہ حکومت کو غلام محمد خان کے سیاسی نظریات سے اختلاف ہوسکتا ہے مگر اس کی سزا اہل خانہ کو کیوں؟
