سرینگر//انجمن شرعی شیعیان کے اہتمام سے ہمدانیہ کالونی بمنہ اور سعدہ کدل سرینگر میں علم شریف کے جلوس برآمد ہوئے ۔ ہمدانیہ کالونی بمنہ میں جلوس علم شریف سے خطاب کرتے ہوئے آغا سید عقیل نے معرکہ کربلا کے کئی گوشوں کی وضاحت کرتے ہوئے امام عالیمقامؑ اور ان کے اصحاب و انصار کی عظیم قربانیوں کو عقیدت کا خراج نذر کیا۔

 

سرینگر//انفارمیشن ٹیکنالوجی اور کھیل کود کے وزیر مولوی عمران رضا انصاری نے چوتھے محرم کے سلسلے میں شیعہ ایسوسی ایشن کی طرف سے عشائی باغ نگین میں منعقد کی گئی یک روزہ مجلس کے دوران امام حُسینؑ کی زندگی کے کئی پہلوؤں پر روشنی ڈالی اور واقعہ کربلا کو اُجاگر کیا۔ عمران رضا انصاری جو شیعہ ایسوسی ایشن کے صدر بھی ہیں، نے اس موقعہ پر امام حُسین ؑ کی تعلیمات کو بیان کرتے ہوئے لوگوں پر زور دیا کہ وہ اسلامی تعلیمات پر عمل پیرا رہیں۔

 

سرینگر//یوم حسینؓ کی تقریب کے سلسلے میں حسب قدیم سرینگر کے تاریخی خانقاہ معلی میں بدھوار ۶ ماہ محرم الحرام ۱۴۳۹؁ھ مطابق ۲۷؍ستمبر 12بجے دن کے بعد میر واعظ کشمیر مولانا ریاض احمد ہمدانی محرم الحرام کی فضیلت ، عاشورہ کی فضیلت اور واقعہ کربلا خاصکر حضرت امام عالی مقامؑ نواسہ رسولﷺ امام حسین مجتبیٰ ؑکی پاک سیرت اور شہادت پر واعظ فرمائیں گے۔عاشورہ ۱۰ محرم الحرام حسب قدیم زیارت حضرت سید عبدالرحمن قلندر(بلبل شاہ صاحبؒ )نواکدل میں صبح 9 بجے سازگار حالات رہنے پر میر واعظ ہمدانی روز عاشورہ کی فضیلت اور شہدائے کربلا کی عظیم شہادت پر وعظ فرمائیں گے ۔

 

 سرینگر/ / چوروں نے عمر آ باد ایچ ایم ٹی میں ایک شہر ی کا موٹر سائیکل اڑا لیا ۔ سی این ایس کے مطابق محمد یعقوب بٹ ساکن عمرآ باد سیکٹر1 لین نمبر1 نے سنیچراور اتور کی درمیانی شب گھر کے باہر موٹر سائیکل زیر نمبرJKO1E3393 کھڑ ی کی جو صبح کے وقت غائب پائی۔پولیس تھا نہ پارم پورہ میں ایک شکا یت درج کی ہے۔

 

 

سرینگر//سی ایم سیکریٹریٹ کے شکایتی سیل کی طرف سے بھیجی گئی ایک شکایت پر جس کے تحت ایک مقامی ریسٹورنٹ نے ایک گاہک سے پانی کی ایک بوتل کے لئے 20روپے کے بجائے 30روپے وصول کئے تھے ،مذکورہ ریسٹورنٹ کی منیجمنٹ کے خلاف ایل ایم ڈی نے وجہ بتائو نوٹس جاری کیاگیا ۔ریسٹورنٹ کی منیجمنٹ دفترمیں حاضر ہوئی اوراپنے قصوروار ہونے کا اعتراف کیاجس کے بعد قصوروارمنیجمنٹ پر 4ہزار روپے کا جرمانہ عائد کیا گیا۔دریں اثنا محرم الحرام کے موقعہ پر محکمہ جڈی بل ،دونی پورہ،خوشحال سر،گوجوارہ،کاٹھی دروازہ،سیدہ کدل ،شالیمار اورتھید علاقوں کا دورہ کرکے کئی قصوروار دکانداروں کے خلاف کارروائی کی اور اُن پر 3800روپے کا جرمانہ عائد کیا۔

 

 

سرینگر//این آئی ٹی سرینگر میں ’’کنکٹنگ پیوپل ٹُو نیچر‘‘ کے موضوع پر سوموار سے5 روزہ قومی ورکشاپ شروع ہوا۔ورکشاپ کے انعقاد کا بنیادی مقصد یہ ہے کہ سائنسدانوں ، ٹیکنوکریٹوں کو اپنے خیالات اور تجربات ایک دوسرے کے ساتھ بانٹنے کا موقعہ فراہم ہو۔سیمنار کے دوران ماحولیات کو تحفظ دینے اور انسانی بقاء کے لئے اس کی اہمیت کو اُجاگر کرنے سے جڑے مختلف پہلوؤں پر تبادلہ خیال کیا جائے گا۔ورکشاپ کے دوران ملک بھر کے نامور سائنسدانوں کی طرف سے لیکچر دیئے جائیں گے جن میں آئی آئی ٹی رُڑکی کے ڈاکٹر وی سی سری واستو، ڈائریکٹر پی ای آر سی چنئی ڈاکٹر وی سرواس برہما نین، آئی آئی ٹی دھنباد کے پروفیسر آئی ایم مشرا، آئی آئی ٹی رُڑکی کے ڈاکٹر ومل کمار اور این آئی ٹی ترچی کے ڈاکٹر اننتھا رمن بھی شامل ہیں۔