پیرس/ ریلا گیرو کی لال بجری پر ایک بار پھر اپنی برتری ثابت کرتے ہوئے یہاں اپنا 10 واں فرانسیسی اوپن ٹینس کا خطاب جیتنے والے اسپین کے مایہ ناز کھلاڑی رافیل نڈال نے اپنا 15 واں گرینڈ سلیم خطاب جیتنے پر خوشی کا اظہار کرتے ہوئے کہا کہ یہ کامیابی ان کی محنت کا نتیجہ ہے ۔ کلے کورٹ کنگ نڈال نے کہا،''یہ ٹورنامنٹ میرے لئے کسی معجزہ سے کم نہیں تھا۔ میں یہاں اپنی پرانی تال میں کھیل پایا اور تمام نتائج میرے حق میں رہے ۔ میں یہاں خطاب جیت کر بہت خوش ہوں''۔۔ 31 سالہ نڈال نے خطابی مقابلے کے بعد کہا ''یہ دن میرے لئے خاص اہمیت رکھتا ہے ۔ پچھلا کچھ وقت انتہائی مشکل رہا۔ میں چوٹوں اور خراب فارم سے جونجھتا رہا لیکن میں نے کبھی خود پر یقین نہیں کھو یااور شاید اسی کا نتیجہ ہے کہ میں یہاں ایک بار پھر کامیاب رہا۔ یہ کامیابی میرے لئے خاص مقام رکھتی ہے ۔'' نڈال نے کہا، "میں آج جہاں ہوں اس کے لیے میں نے بہت محنت کی ہے ۔ریلا گیرو میرے لئے ہمیشہ سے خاص رہا ہے ۔ مجھے نہیں لگتا کہ اس سے زیادہ کچھ ہو سکتا ہے کہ یہ ایک ہی ٹورنامنٹ میں میرا 10 واں ٹائٹل ہے ۔ اس کی برابری نہیں کی جا سکتی ہے ۔'' ا سپین کے کھلاڑی نڈال نے کہا ''میں 31 برس کا ہو چکا ہوں اور کوئی بچہ تو ہوں نہیں۔ یہ حقیقت ہے کہ میں اسے بیان نہیں کرسکتا کہ فرانسیسی اوپن میں 10 واں ٹائٹل میرے لئے کیا معنی رکھتا ہے ۔ مجھے اپنی اس کامیابی پر فخر ہے ۔'' ٹورنامنٹ میں مشکل لمحات کے بارے میں پوچھے جانے پر نڈال نے کہا، "یقیناً سیمی فائنل اور فائنل کے پہلے کا وقت انتہائی مشکل تھا۔ میں تھوڑا نروس بھی ہو رہا تھا ۔ یہ اس لئے مشکل تھا کہ آپ جانتے ہیں کہ یہ وقت گزر گیا تو واپس نہیں آئے گا۔ میں نے ٹورنامنٹ میں اپنے تمام میچ جیتے لیکن کچھ واقعی انتہائی مشکل تھے ۔'' واضح رہے کہ کلے کورٹ کنگ نڈال نے ریلا گیرو کی لال بجری پر 2005، 2006، ،2007، 2008، 2010، 2011، 2012، 2013، 2014 اور 2017 میں خطاب اپنے نام کیا۔نڈال کے 15 گرینڈ سلیم خطابوں میں ایک آسٹریلیا، 10 فرانسیسی، دو ومبلڈن اور دو یو ایس اوپن کے خطاب شامل ہیں۔ نڈال کے کیریئر کا یہ 15 واں گرینڈ سلیم ٹائٹل ہے اور وہ سب سے زیادہ گرینڈ سلیم ٹائٹل جیتنے کی آل ٹائم فہرست میں امریکہ کے پیٹ سمپراس کو پیچھے چھوڑ کر دوسرے نمبر پر آ گئے ہیں۔ نڈال سے آگے اب صرف سوئٹزرلینڈ کے راجر فیڈرر ہیں جن کے نام 18 گرینڈ سلیم ٹائٹل ہیں۔یو این آئی۔
’ محنت کا نتیجہ ہے یہ خطاب‘
