عظمیٰ نیوز سروس
سری نگر//آئندہ ماہ محرم الحرام کے پیش نظر ڈپٹی کمشنر سری نگر، محمد اعجااز اسد نے ہفتہ کو شہر کے مختلف شیعہ آبادی والے علاقوں اور جڈی بل اور حسن آباد کی امام باروں کا وسیع دورہ کیا۔ڈپٹی کمشنر نے میر بہری ڈل کے راستے شیعہ آبادی والے علاقوں کا بھی دورہ کیا۔ان کے ہمراہ ایڈیشنل ڈسٹرکٹ ڈیولپمنٹ کمشنر سری نگر، ظہور احمد میر، ایس ایس پی ٹریفک ٹریفک مظفر احمد شاہ، ایڈیشنل ڈپٹی کمشنر سید احمد کٹاریہ اور دیگر افسران بھی موجود تھے۔ ڈپٹی کمشنر نے متعلقہ محکموں کو موقع پر ہی متعدد ہدایات جاری کیں اور خاص طور پر 9 اور 10 محرم کے لیے وسیع انتظامات پر زور دیا۔
ڈی سی نے ماہ مقدس کے موقع پر ضروری خدمات کا محکمہ وار آڈٹ کرنے پر بھی زور دیا۔اس موقع پر چیف میڈیکل آفیسر اور محکمہ صحت کے افسران سے کہا گیا کہ وہ علاقوں میں ابتدائی طبی امداد کی سہولیات، میڈیکل ٹیمیں اور ایمبولینسیں موجود رکھیں اور جلوسوں کے ساتھ بھی فوری طور پر ابتدائی طبی امداد/طبی علاج کو یقینی بنائیں۔ ڈی سی نے ایس ایم سی اور متعلقہ محکموں سے کہا کہ وہ تمام ناکارہ سٹریٹ لائٹس کی مرمت کریں اور انہیں محرم کے اہم ایام سے پہلے اچھی طرح فعال کر دیں۔ انہوں نے جلوس کے راستوں میں اور سڑکوں کے احاطے کے اندر گلیوں اور نالوں کی صفائی کو یقینی بنانے پر بھی زور دیا۔شیعہ آبادی والے علاقوں میں بلاتعطل بجلی اور پانی کی فراہمی کو یقینی بنانے کے لیے ڈی سی نے تمام انتظامات کرنے کے لیے متعلقہ افسران کو موقع پر ہی ہدایات دیں۔ انہوں نے ایگزیکٹیو انجینئر پی ایچ ای سے بھی کہا کہ جہاں بھی ضرورت ہو وہاں پانی کے ٹینکر کی فراہمی کا بندوبست رکھیں۔ٹریفک حکام سے کہا گیا کہ 7، 9 اور 10 محرم کو محرم کے جلوسوں کے راستوں پرٹریفک کی ہموار نقل و حرکت کو یقینی بنایا جائے ۔ڈی سی نے افسران کو یہ بھی ہدایت کی کہ وہ اشیائے ضروریہ کی قیمتوں پر مناسب نظر رکھیں اور منافع خوری اور ذخیرہ اندوزی سے بچنے کے لیے مارکیٹ کی سخت چیکنگ کریں۔اس موقع پر ڈی سی نے شیعہ برادری کے لوگوں سے ملاقات کی اور انہیں یقین دلایا کہ ماہ محرم الحرام کے موقع پر مناسب انتظامات کئے جائیں گے۔
