عظمیٰ نیوز سروس
سرینگر //کسی بھی واقعہ میں بعض افراد کی شمولیت کو جموں و کشمیر کے لوگوں کیلئے اجتماعی سزا میں تبدیل نہیں کرنا چاہیے کی بات کرتے ہوئے پی ڈی پی صدر محبوبہ مفتی نے خبردار کیا کہ دہلی دھماکے کے بعد ملک کے مختلف حصوں میں معصوم کشمیریوں کو ہراساں، دھمکی یا امتیازی سلوک کا نشانہ نہیں بنایا جانا چاہیے۔دہلی کے لال قلعے کے باہر حالیہ دھماکے میں اپنی جان گنوا بیٹھے کنگن کے بابا نگری وانگت کے نوجوان بلال احمد سانگو کے اہل خانہ سے تعزیت کتنے کے بعد صحافیوں سے بات کرتے ہوئے محبوبہ مفتی نے حکومت پر زور دیا کہ وہ متاثرہ خاندان کی ہر ممکن مدد کرے۔پی ڈی پی صدر نے کہا کہ کسی بھی واقعہ میں بعض افراد کی شمولیت کو جموں و کشمیر کے لوگوں کیلئے اجتماعی سزا میں تبدیل نہیں کرنا چاہیے۔ انہوں نے خبردار کیا کہ دہلی دھماکے کے بعد ملک کے مختلف حصوں میں معصوم کشمیریوں کو ہراساں، دھمکی یا امتیازی سلوک کا نشانہ نہیں بنایا جانا چاہیے۔محبوبہ مفتی نے حکومت سے اپیل کی کہ وہ کشمیری طلبا ، کارکنوں اور خطے سے باہر رہنے والے دیگر افراد کے تحفظ کیلئے ٹھوس اقدامات کرے۔ انہوں نے کہا کہ انہیں امید ہے کہ وزیر اعلیٰ عمر عبداللہ اس معاملے کو وزیر اعظم اور مرکزی وزیر داخلہ کے ساتھ اٹھائیں گے تاکہ کشمیریوں کے حقوق، تحفظ اور عزت کے مکمل تحفظ کو یقینی بنایا جا سکے۔
