محبوبہ مفتی بنام عوام

 پلوامہ//وزیرا علیٰ محبوبہ مفتی نے کہا ہے کہ ریاست میں بات چیت اور ترقیاتی عمل کے مقاصد حاصل کرنے کے ضمن میں ریاستی عوام سے اپیل کی ہے کہ وہ امن کو ایک موقعہ دیں۔پلوامہ میں کئی ترقیاتی پروجیکٹوں کا افتتاح کرنے کے بعد لوگوں کے ساتھ استفسارکرتے ہوئے وزیر اعلیٰ نے کہا کہ یہ مقاصد حاصل کرنے کے لئے امن و سکون کا ایک ساز گار ماحول قائم کرنا ضروری ہے اور اس حوالے سے لوگوں کو بھی اپنا بھر پور رول ادا کرنا چاہئے۔محبوبہ مفتی نے کہا کہ ریاست کے لوگوں پر یہ بڑی ذمہ داری عائد ہوتی ہے کہ وہ ریاست میں ایک ساز گار اور پُر امن ماحول کے قیام کو یقینی بنائیں تاکہ اس کے مثبت اثرات دونوں ہمسایہ ممالک کے درمیان رشتوں پر بھی مرتب ہوں۔وزیرا علیٰ نے اس بات پر افسوس کا اظہار کیا کہ پچھلے مہینوں کے نامساعد حالات سے سماج کے ہر ایک طبقے کو مشکلات جھیلنے پڑے اور ریاست میں ترقیاتی پروجیکٹوں کی تکمیل میں بھی تاخیر ہوئی۔مقامی لوگوں کے مطالبات کے تناظر میں محبوبہ مفتی نے کہا کہ وہ پلوامہ میں ایک پی ایچ ای ڈویژن قائم کرنے کے امکانات کا جائزہ لیں گی۔انہوں نے کہا کہ پرچھومیوہ منڈی قائم کرنے میں حائل رکاوٹوں کو بھی دور کیا جائے گا۔وزیر اعلیٰ نے رمبی آرہ اوررومشی نالوں پر 40کروڑ روپے لاگت والے پلوں کا سنگ بنیاد رکھا ۔یہ عالمی بینک کے معاونت والے جہلم توی فلڈ ریکوری پروجیکٹ کے تحت 2برسوں کے اندر اندر مکمل کئے جائیں گے۔رمبی آرہ پر ترنج شوپیان اور رومشی نالہ پر رہمو کے مقام پر پل تعمیر کئے جائیں گے۔ محبوبہ مفتی نیپلوامہ میں گورنمنٹ وومنز ڈگری کالج کا افتتاح کیا جبکہ پلوامہ میں طالبات کے لئے سکوٹی سکیم کی شروعات بھی کی۔بعد میںوزیر اعلیٰ نے افسروں کی ایک میٹنگ کے دوران ضلع میں جاری ترقیاتی سرگرمیوں پر ہورہی پیش رفت کا جائزہ لیا۔وزیر اعلیٰ نے بجلی حکام سے کہا کہ وہ بجلی کی تقسیم کاری نظام کو اس ڈھنگ سے ترتیب دیں کہ موسم سرما کے دوران عام لوگوں کو کسی قسم کی دقتوں کا سامنا نہ کرنا پڑے ۔انہوں نے پی ایچ ای محکمہ سے کہا کہ وہ ببہار اور درسو علاقوں میں لوگوں کو پینے کے پانی کی سپلائی کے حوالے سے شکایات پر غور کریں۔میٹنگ میں بتایاگیا کہ پلوامہ سرکیولرروڑ پروجیکٹ مکمل کیا گیا ہے اس کے علاوہ پلوامہ میں نرسنگ کالج بھی چالو کیا گیا ہے۔اسی طرح اونتی پورہ میں ایمز کے لئے حصول اراضی کا کام بھی عنقریب شروع کیا جائے گا۔جبکہ کیمپس کی طرف جانے والی سڑک کے لئے درکار اراضی کی کاغذی لوازمات اس وقت پوری کی جا رہی ہے۔اس موقعہ پر مزید بتایا گیا کہ ضلع میں کئی اہم سڑک پروجیکٹوں پر کام جاری ہے جن میں پلوامہ ۔ لاسی پورہ ،لاسی پورہ ۔ کامری،اونتی پورہ ۔ ترال اور کلیدی نوعیت کے پروجیکٹ بھی شامل ہے۔