عظمیٰ مانیٹرنگ ڈیسک
نئی دہلی// انکم ٹیکس میں کمی کے چند دنوں بعد متوسط طبقے کے لیے ایک اور خوشخبری ہے۔ آر بی آئی ایم پی سی کی جانب سے شرح سود میں 25 بیسس پوائنٹس (bps) کی کمی کے بعد ان کا ای ایم آئی (EMI) بوجھ کم ہونے والا ہے۔ نئے قرض لینے والوں کے لیے بھی جلد ہی ہوم لون، آٹو لون اور پرسنل لون سستے ہونے والے ہیں۔ریزرو بینک آف انڈیا کی چھ رکنی مانیٹری پالیسی کمیٹی (ایم پی سی) نے ریپو ریٹ میں 25 بیسس پوائنٹس کی کمی کرکے 6.25 فیصد کردی۔ یہ پانچ سالوں میں ریزرو بینک آف انڈیا کی طرف سے شرح میں پہلی کٹوتی ہے، آخری بار مئی 2020 میں ریپو ریٹ میں کمی کی تھی۔ ریپو ریٹ وہ شرح ہے جس پر آر بی آئی دوسرے بینکوں کو قرض دیتا ہے۔کوویڈ (مئی 2020) کے بعد آر بی آئی کی طرف سے یہ شرح سود میں پہلی کمی ہے۔ مئی 2020 اور اپریل 2022 کے درمیان، آر بی آئی نے ریپو ریٹ کو 4 فیصد پر برقرار رکھا تھا۔ اس کے بعد اس نے اپریل 2022 سے پالیسی ریٹس میں اضافہ کرنا شروع کیا اور آہستہ آہستہ فروری 2023 تک اسے 6.5 فیصد تک بڑھا دیا، جس کے بعد اسے دو سال تک برقرار رکھا گیا۔