بلاشبہ زمینی اور آسمانی آفتوں کی تاریخ انسانی وجود سےشروع ہوتی ہے،اگرچہ اس میں انسانی ہاتھ کا کوئی عملِ دخل نہیں ہوتا،پھر بھی یہ آفات آندھی،طوفان ،سیلاب ،زلزلے ،آتش زدگی ،وبائی بیماری اور خشک سالی کی صورت میں انسانی آبادیوں کو صفحہ ہستی سے مٹا دیتی ہے یا پھرانہیں بڑے پیمانے پرجانی و مالی نقصانات سے دوچارکرکے آلام و مصائب میں مبتلا کرتی ہے۔زندگی تلپٹ ہوجاتی ہے ، شادو آباد گھرانوں کے آشیانے کھنڈربن جاتے ہیں،سارانظا م تہس نہس ہوکر زندگی مفلوج ہوجاتی ہےاورپھر بیشترلوگوں کے لئےزندگی کا نظام بحال کرنا مشکل ہی نہیں ناممکن سا بن جاتا ہے۔
آتش زدگی بھی آفات کے زمرےمیںآتی ہے،اگرچہ اس میں انسان کی لاپروہی یا غفلت بھی شامل ہوتی ہے تاہم اسے آفت ہی کہا جاتا ہے۔چنانچہ اپنی اس وادیٔ کشمیرکے اطراف و اکناف میں گذشتہ برس کے دوران ، خصوصاً سرما کے یخ بستہ موسم میں بھی آتش زدگی کی وارداتوںکو جو سلسلہ تواتر کے ساتھ جاری رہا،اُن میں بے تحاشا مالیت کی تعمیرات اور دوسرے املاک تباہ و برباد ہوگئے۔آگ کی ان وارداتوں کی خبریںیہاں کے اخبارت کی زینت بنتی گئیںجن میں ہونے والے اثاثوں کے نقصانات کی تفاصیل بھی درج ہوتی ر ہیں۔ ان وارداتوں میں اگرچہ جانی نقصان محدود پیمانے پر ہوا تاہم بہت بڑے پیمانے پر لوگوں کو مالی نقصان سے دوچار ہونا پڑا۔ زیادہ تر متاثرین کی نظام ِزندگی اس قدر مفلوج ہوکر رہ گئی کہ وہ بے کسی اور بے بسی کے عالم میں جینے پر مجبورہوئے۔ظاہر ہےکہ زندگی بھر کی جمع پونجی ،مال و اسباب اور زندگی گذارنے کا بسیرا ہی جب نہ رہ جائے تو جینے کے لئے باقی کیا رہ جاتا ہے۔ اگرچہ اس سنگین صورتِ حال کے دورا ن بھی انسانی فطرت کے تقاضے کے مطابق کئی لوگ، نوع ِ انسانی کی مدد کے لئے پیش پیش رہے اور انسانیت کے ناطے وقتی طور پر متاثرین کے ساتھی اور مددگاربنتے رہےاوراُن کی ہمت بڑھاتے رہے۔جبکہ حکومتی ادارے بھی ان موقعوں پر متحرک ہوگئے،فائر سروس اورپولیس عملے اپنی ذمہ داریاں بخوبی نبھاتے رہے۔ بعض رضاکار تنظیمیں بھی اپنا کردار ادا کرتے رہے،گویا ہرادارہ آتش زدہ گان کو راحت پہنچانے کی حتی المکان کوشش ضرورکرتارہا ،مگر پھر وقت گذر جانے کے ساتھ ساتھ معاملہ آیا گیا ہوتا رہا اور متاثرین کو اُن کے حال میں چھوڑ دیا گیا۔کیا اسی طرح کے امداد سے متاثرین کی زندگی بحال ہوجاتی ہے؟یہ ایک اہم سوال ہےجو غوروفکر کرنے کی دعوت دیتا ہے۔بلا شبہ کسی بھی قدرتی آفت کے شکار لوگوں کی زندگی بحال کرنےکی اہم ذمہ داری حکومت کی ہی ہوتی ہے،تاکہ متاثرین کےجسم و جان کا رشتہ نہ ٹوٹے اوراُن کی زندگی کی بحالی کے لئےوہ سب کچھ کرے،جس سے متاثرین اپنے معاشرے میںپہلے جیسے کی طرح زندگی گذار سکیں،کیونکہ اسی مقصد کے تحت حکومت،سرکار کہلاتی ہے ۔ظاہر ہے کہ سرکاری انتظامیہ میں ایسے مخصوص شعبے قائم ہوتے ہیں جو آفت زدہ لوگوں کی دوبارہ بحالی کے کام کے لئے مامور ہوتے ہیں، لیکن جہاں تک دیکھنے میں آرہا ہے کہ آج تک آتش زدہ متاثرین کی بحالی کے لئے حکومت کی طرف سے جو بھی ریلیف منظور ہوتی ہے ،اُسے متاثرین تک پہنچنے میں ایک لمبا عرصہ لگ جاتا ہے اور وہ بھی تب،جب متاثرین کے جوتےتک متعلقہ سرکاری اداروں کے چکر لگانے میں پھٹ جاتے ہیں۔ یہ بھی بتایا جاتا ہے کئی متاثرین کو منظور شدہ سرکاری ریلیف قسطوں میں دی جاتی ہے،جوکہ اُن کی بحالی میں کار آمد ثابت نہیں ہوتی ۔سچ تو یہ بھی ہے کہ جن لوگوں کے املاک اِنشورنڈ ہوتے ہیں ،وہ تو پُر سکون رہتے ہیں،لیکن جنکے تعمیرات اور جائیدادیں غیر اِنشورنڈ ہوتی ہیں،اُن کی حالت بَد سے بَدتر ہوجاتی ہے ۔سردیوں کے ان ایام میں متاثرین ،بغیر آشیانوں کے زندگی کیسے اور کس طرح گزارتے ہوں گے ، یہ تو کوئی بھی ذی حِس اور باشعور انسان بخوبی محسوس کرسکتا ہے۔ اب جبکہ برف باری اور بارشوں کا سلسلہ بھی شروع ہوا ہے ،تو ضرورت اس بات کی ہے کہ موجودہ یوٹی سرکار اپنے اُن اداروں کو متحرک کریں ،جو آفات سے متاثرہ لوگوں کی راحت اور بحالی کے لئے قائم ہیں۔اس معاملے میں فائر سروس اور پولیس محکمہ پر بھی لازم ہے کہ وہ متاثرین کے متعلق اپنی تفصیلی رپورٹیںجلد از جلد متعلقہ محکمہ تک پہنچائیں تاکہ مزید تاخیر کے متاثرین تک وہ امدادی رقم پہنچ پائے جو اُن کے لئے بطور ایکس گریشا ریلیف منظور کی گئی ہو،ورنہ متاثرین کے لئے مزید مصائب پیدا ہونے کا احتمال بڑھتا جارہا ہے۔
