عظمیٰ نیوز سروس
نئی دہلی//محکمہ موسمیات(آئی ایم ڈی)نے ملک بھر میں جنوب مغربی مانسون کے فعال ہونے کا باضابطہ طور پر اعلان کیا ہے جو کہ 8جولائی کی اپنی معمول کی تاریخ سے 9 دن پہلے ہے۔ جب کہ ملک بھر میں مانسون کی آمد سے کسانوں کو بڑی راحت ملی ہے، وہیں کئی ریاستوں میں سیلاب کا خطرہ منڈلانے لگا ہے۔ شمال سے جنوب تک اور پہاڑوں سے لے کر میدانوں تک، شدید بارشوں کے درمیان زیادہ تر علاقوں سے سیلاب کی تصویریں آرہی ہیں۔ ملک کے کئی بڑے شہروں کی سڑکیں پانی سے بھری ہوئی ہیں، پہاڑوں پر بادل پھٹنے اور لینڈ سلائیڈنگ کے واقعات رپورٹ ہوئے ہیں۔ہماچل پردیش میں مانسون کی آمد کے ساتھ ہی تباہی شروع ہوگئی ہے۔ اس پہاڑی ریاست کے کئی اضلاع سے آسمانی تباہی کی تصویریں مسلسل آ رہی ہیں۔ 25 جون کو کلو میں بادل پھٹنے سے ہونے والی تباہی کا خوف لوگوں کے ذہنوں میں ابھی تک تازہ تھا، جب ہماچل میں ایک بار پھر قدرت کی خوفناک شکل دیکھنے کو ملی۔ ہماچل پردیش کے سولن ضلع میں رات بھر کی بارش کے بعد پٹریوں پر پتھر اور درخت گرنے کے بعد اتوار کو شملہ-کالکا ریلوے لائن پر خدمات معطل کردی گئیں، جبکہ قومی شاہراہ پر مٹی کے تودے گرنے کی وجہ سے ٹریفک گھنٹوں تک درہم برہم رہا۔ منڈی ضلع میں مسلسل بارش سے بیاس ندی کی سطح آب میں اضافہ ہوا ہے۔ ہماچل پردیش میں بارش، بادل پھٹنے اور لینڈ سلائیڈنگ سے متعلق مختلف واقعات میں اب تک 30 سے زائد افراد اپنی جانیں گنوا چکے ہیں۔ حکومت اور انتظامیہ لوگوں سے دریاں سے دور رہنے کی اپیل کر رہی ہے۔ وادی کانگڑا میں شدید بارش کے بعد کئی سڑکیں بند ہو گئی ہیں۔ کئی مقامات پر لینڈ سلائیڈنگ کے بعد قومی شاہراہ پر گاڑیوں کی لمبی قطاریں لگ گئیں۔ محکمہ موسمیات نے ہماچل پردیش کے 10 اضلاع میں شدید بارش کا الرٹ جاری کیا ہے۔ اگر محکمہ موسمیات کی بات کی جائے تو ہماچل میں کئی مقامات پر یکم جولائی تک موسلادھار بارش کا سلسلہ جاری رہے گا۔محکمہ موسمیات نے پٹنہ سمیت بہار کے 10 اضلاع میں موسلادھار بارش کی پیش گوئی کی ہے۔ دریں اثنا، اتراکھنڈ میں شدید بارش کے لیے ریڈ ایلرٹ کے بعد چار دھام یاترا کو اگلے 24 گھنٹوں کے لیے ملتوی کر دیا گیا ہے۔ آئی ایم ڈی نے اترکاشی، رودرپریاگ، دہرادون، ٹہری، پوڑی، چمپاوت، باگیشور، ادھم سنگھ نگر اور ہریدوار کے لیے ریڈ ایلرٹ جاری کرتے ہوئے انتہائی تیز بارش کی وارننگ دی ہے۔
