محمد تسکین
بانہال // جموں سرینگر قومی شاہراہ سے ناشری ٹنل کے باہر سے بٹوٹ اور ڈوڈہ کشتواڑ کو جوڑنے والی سابقہ قومی شاہراہ پر بٹوٹ کے نزدیک ایک ٹرک کو آگ لگنے کی واردات میں ٹرک اور اس میں لدھے ایف سی آئی کے چاول جل کر راکھ ہوگئے ہیں تاہم ٹرک میں سوار ڈرائیور اور کنڈیکٹر محفوظ ہیں۔پولیس نے بتایا کہ سابقہ قومی شاہراہ پر ایک ٹرک زیر نمبرJK-02AD/8393 کے کیبن میں اچانک آگ نمودار ہوئی جس سے چند ہی لمحوں میں ٹرک مکمل طور سے خاکستر ہوگیا تاہم اس حادثے میں کوئی شخص زخمی نہیں ہوا ہے۔ انہوں نے کہا کہ یہ ٹرک جموں سے ایف سی آئی جے چاول لیکر ڈوڈہ جا رہا تھا۔ انہوں نے کہا کہ اس حادثے کی اطلاع ملتے ہی بٹوٹ پولیس اور فائر سروس بٹوٹ کے اہلکار اور گاڑی موقع پر پہنچ گئے اور فائر سروسز کے اہلکاروں نے آگ کی ہولناک لپٹوں کو فوری طور پر قابو کیا۔اس واقع کی وجہ سے ناشری۔ بٹوٹ اور ڈوڈہ کو جوڑنے والی شاہراہ کا ٹریفک کچھ وقت کیلئے اثر انداز رہا اور آگ پر قابو پانے کے بعد معمول کا ٹریفک بحال کیا گیا۔ پولیس نے ایک کیس درج کرکے اس معاملے کی تحقیقات شروع کر دی ہے۔
