عظمیٰ نیوز سروس
سرینگر// چیف سکریٹری اتل ڈلو نے جموں و کشمیر میں نافذ مالی شمولیت اور سماجی تحفظ کی اسکیموں کی پیش رفت اور اثرات کا جائزہ لیا۔انہوں نے ایک میٹنگ میںپردھان منتری جن دھن یوجنا (PMJDY)، پردھان منتری تحفظ بیمہ یوجنا (PMSBY)، پردھان منتری جیون جیوتی بیمہ یوجنا (PMJJBY)، اٹل پنشن یوجنا (APY)، عمارت اور دیگر تعمیراتی کاموں سمیت اہم اہم اقدامات کا جائزہ لیا۔ چیف سکریٹری نے ان اسکیموں کے زمینی سطح پر اثرات کا جائزہ لینے کی اہمیت پر زور دیا، متعلقہ محکموں اور جے اینڈ کے بینک کو ہدایت کی کہ وہ تمام اضلاع میں ان کی نئے سرے سے حوصلہ افزائی کریں۔ انہوں نے مقامی آبادی کے مقابلے میں مالیاتی رسائی کا اندازہ لگانے کے لیے ضلع وار منفرد بینک کھاتوں کا تفصیلی مطالعہ کرنے کی ضرورت پر زور دیا اور اس بات کو یقینی بنانے کے لیے کہ اہل مستفیدین کی جامع طور پر شناخت کرنے اور دستیاب سوشل سیکورٹی سکیموں کے تحت ان کا احاطہ کرنے پر زور دیا۔اجلاس کو مالی شمولیت اور فلاحی اقدامات دونوں کے تحت حالیہ برسوں میں حاصل کی گئی اہم کامیابیوں سے آگاہ کیا گیا۔ پی ایم جے ڈی وائی کے تحت مارچ 2025 سے اب تک تقریبا 1.9 لاکھ نئے اکائونٹس شامل کیے گئے ہیں، جس سے کل 23.33لاکھ فعال اکائونٹس ہو گئے ہیں۔چیف سیکرٹری نے تمام اسٹیک ہولڈروںکی جانب سے زیادہ سے زیادہ کوریج، بیداری بڑھانے اور ہر مستحق شہری تک فوائد کی بروقت فراہمی کو یقینی بنانے کیلئے مسلسل کوششوں کی ضرورت پر زور دیا۔
